पीएमपी बसमध्ये व्हिडिओ रील शूट केल्यास होणार कारवाई!

पुणे : पुणे महानगर परिवहन महामंडळाच्या (पीएमपी) बसमध्ये चालक व वाहक सेवेत असताना मोबाइलवर फोटो, व्हिडिओ शूटिंग, रील तयार करणे आणि ते सोशल मीडियावर प्रसारित करण्यास प्रतिबंधित करण्यात आला आहे. याबाबतच ‘पीएमपी’कडून सर्व आगारांना स्पष्ट निर्देश देण्यात आले आहेत. पीएमपी प्रशासनाची परवानगी न घेता रील अथवा चित्रीकरण केल्यास संबंधितांवर थेट गुन्हे दाखल करण्याचे आदेश पीएमपीचे अध्यक्ष पंकज देवरे यांनी अधिकाऱ्यांना दिले आहेत.
पीएमपीच्या बस मार्गावर संचलनात असताना काही सेवक बसमध्ये, महामंडळाचा गणवेश व ओळखपत्रासह मोबाइलद्वारे फोटो, व्हिडिओ शूटिंग, रिल्स तयार करून त्या सोशल मीडियावर प्रसारित करीत असल्याचे समोर आले आहे. काही चालक, वाहक, सेवक हे कर्तव्यावर असताना रिल स्टार, यूट्यूबर किंवा तत्सम व्यक्तींना कोणतीही अधिकृत परवानगी नसताना गणवेश, ई-मशिनसह महामंडळाच्या बसमध्ये फोटो, व्हिडिओ अथवा रिल्स तयार करण्यासाठी सहकार्य करत असल्याचे निदर्शनास येत आहे.