मुंबई : तुरुंगात कैद्याला चांगली वागणूक मिळावी, यासाठी त्याच्या भावाकडून १० हजारांची लाच घेणारा वरिष्ठ तुरुंग अधिकारी आणि पोलिस कॉन्स्टेबलला लाचलुचपत प्रतिबंधक विभागाच्या (एसीबी) अधिकाऱ्यांनी अटक केली. नवी मुंबईतील तळोजा तुरुंगात हा प्रकार घडला. एका गुन्ह्यात तळोजा तुरुंगात असलेल्या कैद्याने त्याच्या भावाला एका मोबाइलवरून फोन केला. तुरुंगातील परिस्थिती कथन करताना त्याने अधिकारी आणि कर्मचाऱ्यांकडून दिलेल्या त्रासाबद्दल माहिती दिली. तुरुंग अधिकारी निवृत्ती कन्नेवाड आणि पोलिस कॉन्स्टेबल राहुल गरड यांना पैसे न दिल्याने ते त्रास देत असल्याचे त्याने सांगितले. कैद्याची कैफियत ऐकून त्याच्या भावाने मोबाइल क्रमांकावर ऑनलाइन एक हजार रुपये पाठवले.
एकदा पैसे मिळाल्याचे पाहून दुसऱ्या दिवशी त्याच मोबाइलवरून पुन्हा कैद्याच्या भावाला संपर्क साधण्यात आला. भावाला तुरुंगात त्रास सहन करायचा नसेल तर १० हजार रुपये पाठवावे लागतील, असे त्याला धमकावण्यात आले. आर्थिक परिस्थिती बेताची असल्याने इतकी मोठी रक्कम देणे अशक्य होते. त्यामुळे कैद्याच्या भावाने याबाबत ‘एसीबी’च्या मुंबई कार्यालयात लेखी तक्रार केली. ‘एसीबी’च्या अधिकाऱ्यांनी गंभीर दखल घेत तक्रारीची शहानिशा केली. तक्रारीमध्ये तथ्य असल्याचे स्पष्ट होताच, ‘एसीबी’च्या पथकाने तुरुंग परिसरात सापळा रचला. गरडने कैद्याच्या भावाकडून १० हजार रुपये घेतले. पैसे मिळताच त्याने कन्नेवाडला मोबाइलवरून कळवले. त्यानंतर कन्नेवाडला गरडकडून पैसे घेताना पकडण्यात आले. याप्रकरणी ‘एसीबी’च्या अधिकाऱ्यांनी गुन्हा दाखल करून कन्नेवाड आणि गरड यांना अटक केली. न्यायालयाने त्यांची १७ डिसेंबरपर्यंत पोलिस कोठडीत रवानगी केली आहे.