देशभक्ती, संस्कृती आणि सामाजिक बांधिलकीचा अनोखा संगम; ‘इंडियन वॉक फॉर नेशन ३.०’चा जागतिक विक्रमाकडे ऐतिहासिक प्रवास

मुंबई : भारतीय संस्कृती, देशभक्ती आणि सैनिकांप्रती कृतज्ञता यांचा प्रेरणादायी संगम घडवणारा ‘इंडियन वॉक फॉर नेशन ३.०’ हा भव्य उपक्रम मुंबईतील लोकशाहीर अण्णाभाऊ साठे सभागृहात उत्साहात पार पडला. आर्मी ब्रॅट अंजली साखरे यांच्या संकल्पनेतून आणि ASVFI Foundation तसेच Valiant Fame Icon (VFI) यांच्या संयुक्त विद्यमाने आयोजित करण्यात आलेला हा कार्यक्रम World Record of Excellence, England च्या जागतिक विक्रम प्रयत्नांतर्गत पार पडला. कारगिल विजय दिवस आणि स्वातंत्र्यदिनाच्या पार्श्वभूमीवर आयोजित या उपक्रमाने भारतीय वारसा, विविधतेतील एकता आणि राष्ट्रप्रेमाचा प्रभावी संदेश दिला. जिल्हा सैनिक कल्याण कार्यालयाच्या सहकार्याने झालेल्या या कार्यक्रमात सशस्त्र सेना ध्वजदिन निधीसाठी ₹१,००,००१ रुपयांची देणगी जाहीर करण्यात आली. हा कार्यक्रम केवळ सांस्कृतिक किंवा फॅशन रनवेपुरता मर्यादित न राहता सैनिकांच्या बलिदानाला मानवंदना अर्पण करणारा सामाजिक उपक्रम ठरला. कार्यक्रमातील सर्वाधिक भावनिक क्षण म्हणजे जिल्हा माहिती अधिकारी मनोज सुमन शिवाजी सानप यांनी सादर केलेला ‘शहीद कॅप्टन विनायक गोरे’ हा हृदयस्पर्शी एकपात्री प्रयोग. शहीद जवानांचे बलिदान, त्यांच्या कुटुंबीयांचे त्याग आणि सशस्त्र सेना ध्वजदिन निधीचे महत्त्व प्रभावीपणे मांडत त्यांनी प्रत्येक नागरिकाने सैनिकांच्या कुटुंबांच्या पाठीशी उभे राहण्याचे भावनिक आवाहन केले. या सादरीकरणाने उपस्थितांच्या डोळ्यांत अश्रू तरळले आणि संपूर्ण सभागृह राष्ट्रभक्तीच्या भावनेने भारावून गेले. कार्यक्रमात ४ वर्षांच्या चिमुकल्यांपासून ते ९४ वर्षांच्या ज्येष्ठ नागरिकांपर्यंत शंभरहून अधिक सहभागी भारतीय परंपरा, विविध राज्यांची संस्कृती आणि राष्ट्रप्रेमाचे दर्शन घडवत रॅम्पवर उतरले. हा रनवे फॅशनचा नव्हे, तर भारतीय संस्कृती, सामाजिक ऐक्य आणि सैनिकांप्रती आदर व्यक्त करणारा ठरला. विविध वयोगटांतील नागरिकांनी उत्स्फूर्त सहभाग नोंदवत देशभक्तीची अनोखी मानवंदना अर्पण केली.

या विशेष उपक्रमात मेजर प्रांजल जाधव (जिल्हा सैनिक कल्याण अधिकारी, मुंबई-ठाणे), ब्रिगेडियर सुशील भसीन, ब्रिगेडियर उदयकुमार देशमुख (SM, VSM), कर्नल तुषार जोशी (SM), लेफ्टनंट कर्नल नीता चव्हाण, लेफ्टनंट कर्नल नितीशा चौहान, लेफ्टनंट कर्नल मनोज कुमार सिन्हा (SM), लेफ्टनंट कर्नल धरमदत्त गोयल, कॅप्टन प्रदीप पट्टनायक, कमांडर विजय प्रताप सिंग, लेफ्टनंट कमांडर निधी तनेजा, फ्लाईंग ऑफिसर इतिशा, सार्जंट विवेक घोसाळकर यांच्यासह अनेक माजी सैनिक आणि माझगाव डॉकचे चीफ मॅनेजर विज्ञानेश मासावकर यांनी सहभाग घेतला. त्यांच्या उपस्थितीमुळे कार्यक्रमाला विशेष महत्त्व प्राप्त झाले. या देशभक्तीपर उपक्रमाची दखल घेत World Record of Excellence, England चे उपाध्यक्ष संजय पंजवानी यांच्या हस्ते आयोजकांना Provisional World Record Certificate प्रदान करण्यात आले. त्यामुळे भारतीय संस्कृती, देशभक्ती आणि सामाजिक उत्तरदायित्वाचा संदेश देणारा हा उपक्रम जागतिक विक्रमाच्या दिशेने महत्त्वाचे पाऊल टाकणारा ठरला. कार्यक्रमाच्या आयोजक अंजली साखरे यांनी सांगितले की, “सैनिकांच्या बलिदानाची परतफेड कधीच होऊ शकत नाही. मात्र त्यांच्या कुटुंबाच्या पाठीशी उभे राहणे हे प्रत्येक भारतीयाचे राष्ट्रीय कर्तव्य आहे. ‘इंडियन वॉक फॉर नेशन’ हा केवळ एक रनवे नसून राष्ट्राला दिलेली सामूहिक मानवंदना आहे.” या उपक्रमाला बँक ऑफ इंडिया, इंडियन ऑइल, एलआयसी, पितांबरी, एनएम तसेच विविध सहकारी संस्था, प्रायोजक, स्वयंसेवक आणि नागरिकांचे मोलाचे सहकार्य लाभले. त्यांच्या योगदानामुळे हा कार्यक्रम देशभक्ती, संस्कृती आणि सामाजिक जबाबदारीचा प्रेरणादायी उत्सव ठरला. आयोजकांनी भविष्यातही अशाच उपक्रमांद्वारे सैनिकांप्रती कृतज्ञता व्यक्त करत समाजात राष्ट्रीय एकात्मतेची भावना अधिक बळकट करण्याचा निर्धार व्यक्त केला.