मुंबई : मुंबईच्या उपनगरीय रेल्वे प्रवाशांसाठी प्रजासत्ताक दिनानिमित्त मध्य रेल्वेने एक मोठी भेट दिली आहे. हार्बर मार्गावर प्रवाशांच्या वाढत्या मागणीचा विचार करून, २६ जानेवारी २०२६ पासून छत्रपती शिवाजी महाराज टर्मिनस ते पनवेल दरम्यान १४ नवीन वातानुकूलित (एसी) लोकल फेऱ्या सुरू करण्याचा निर्णय घेण्यात आला आहे. या नवीन एसी फेऱ्या सध्या धावत असलेल्या साध्या लोकलच्या जागी सुरू केल्या जाणार आहेत. यामुळे मध्य रेल्वेवरील एकूण एसी फेऱ्यांची संख्या आता ९४ वर पोहोचली आहे. यामध्ये मुख्य मार्गावरील ८० आणि हार्बर मार्गावरील १४ फेऱ्यांचा समावेश आहे.
महत्त्वाच्या फेऱ्यांच्या वेळा :
- सकाळची सुरुवात: पहिली एसी सेवा पहाटे ४.१५ वाजता वाशी ते वडाळा रोड दरम्यान धावेल.
- पनवेल ते सीएसएमटी: पनवेलहून पहिली एसी लोकल सकाळी ६.१७ वाजता सुटेल आणि ७.३६ वाजता मुंबईत पोहोचेल.
- गर्दीच्या वेळा: सकाळी ९.०९ वाजता पनवेलहून सीएसएमटीसाठी एसी लोकल उपलब्ध असेल.
- दुपारच्या फेऱ्या: पनवेलहून दुपारी १२.०३ आणि २.३१ वाजता एसी लोकल सुटतील.
- संध्याकाळची वेळ: संध्याकाळी ५.३० ते रात्री ८.०० या वेळेत सीएसएमटी आणि वडाळा रोडसाठी विशेष फेऱ्यांचे नियोजन करण्यात आले आहे.
- शेवटची फेरी: सीएसएमटीहून पनवेलसाठी शेवटची एसी लोकल रात्री ८.०० वाजता सुटेल.
रविवारी आणि रेल्वेने जाहीर केलेल्या सुट्ट्यांच्या दिवशी पहाटेच्या काही ठराविक फेऱ्या साध्या (नॉन-एसी) लोकलने चालवल्या जातील. यामध्ये पहाटे ४.१५ ची वाशी-वडाळा, ६.१७ ची पनवेल-सीएसएमटी आणि ५.०६ ची वडाळा-पनवेल या गाड्यांचा समावेश आहे. या निर्णयामुळे वाशी, वडाळा रोड आणि पनवेल यांसारख्या महत्त्वाच्या स्थानकांवरून प्रवास करणाऱ्या प्रवाशांचा प्रवास आता अधिक आरामदायी होणार आहे. विशेषतः उन्हाळा आणि गर्दीच्या वेळी एसी लोकलमुळे मुंबईकरांना मोठा दिलासा मिळणार आहे.
