मुंबई : महाराष्ट्र शासनाच्या ‘मुख्यमंत्री माझी लाडकी बहीण योजने’च्या अंमलबजावणीत अधिक सुसूत्रता आणण्यासाठी महिला व बालविकास मंत्री आदिती तटकरे यांनी एक महत्त्वपूर्ण पाऊल उचलले आहे. योजनेचा लाभ घेताना येणाऱ्या तांत्रिक अडचणी आणि महिलांच्या मनातील शंका दूर करण्यासाठी आता हक्काची मदत उपलब्ध झाली आहे. अनेक महिलांनी e-KYC प्रक्रिया पूर्ण करताना अनावधानाने चुकीचा पर्याय निवडला होता, ज्यामुळे त्यांचा हप्ता रखडला होता. या तांत्रिक त्रुटी आणि इतर तक्रारींचे निराकरण करण्यासाठी सरकारने १८१ हा महिला हेल्पलाईन क्रमांक कार्यान्वित केला आहे. या सुविधेसाठी खास ऑपरेटर्सना प्रशिक्षण देण्यात आले असून, महिलांना फोनवरच त्यांच्या समस्यांचे उत्तर मिळणार आहे. ज्या महिलांच्या अर्जात e-KYC संबंधित चुका झाल्या आहेत, त्यांना घाबरण्याचे कारण नाही. अशा लाभार्थी महिलांची आता स्थानिक पातळीवर अंगणवाडी सेविकांमार्फत प्रत्यक्ष पडताळणी केली जाणार आहे. या पडताळणीनंतर पात्र महिलांचा रखडलेला लाभ पुन्हा सुरू केला जाईल. ३१ डिसेंबर २०२५ पर्यंत ही प्रक्रिया पूर्ण करण्याची मुदत देण्यात आली होती, मात्र त्रुटी दूर करण्यासाठी क्षेत्रीय स्तरावर ही विशेष मोहीम राबवण्यात येत आहे.
विदर्भासह राज्यातील अनेक भागांत नोव्हेंबर आणि डिसेंबर २०२५ चे हप्ते वेळेवर न मिळाल्याने महिलांनी संताप व्यक्त केला होता. यावर स्पष्टीकरण देताना प्रशासनाने कळवले आहे की :
- नोव्हेंबरचा हप्ता डिसेंबर अखेर आणि जानेवारीच्या पहिल्या आठवड्यात वितरित करण्यात आला.
- डिसेंबर महिन्याचा १५०० रुपयांचा हप्ता १४ जानेवारीच्या सुमारास पात्र महिलांच्या खात्यात जमा करण्यात आला आहे.
ज्या महिलांना अद्याप लाभ मिळालेला नाही, त्यांनी तात्काळ १८१ या क्रमांकावर संपर्क साधून आपली तक्रार नोंदवावी, असे आवाहन आदिती तटकरे यांनी केले आहे.
