पुणे : सर्वसामान्य नागरिकांची दिवाळी गोड व्हावी या उद्देशाने ‘दि पूना मर्चंट्स चेंबर’ने गेल्या ३९ वर्षांपासून सुरू ठेवलेल्या ‘ना नफा, ना तोटा’ तत्त्वावरील लाडू-चिवडा विक्री उपक्रमाला यंदाही उत्स्फूर्त सुरुवात झाली आहे. यावर्षी सुमारे २ लाख किलो लाडू आणि २ लाख किलो चिवडा तयार करण्यात येत असून, नागरिकांना दर्जेदार फराळ रास्त दरात उपलब्ध करून दिला जात आहे. वाढत्या महागाईमुळे यंदा एक किलो लाडू किंवा चिवड्याची किंमत २३० रुपये ठेवण्यात आली असून, एक किलो आणि अर्धा किलोची पॅकेट्सही विक्रीसाठी उपलब्ध आहेत. या उपक्रमात तब्बल ६०० हून अधिक शेफ आणि कामगार दिवस-रात्र कार्यरत असून, त्यांच्या वैद्यकीय तपासणीनंतरच उत्पादन प्रक्रियेत सहभागी करून घेण्यात आले आहे. स्वच्छ वातावरणात आणि उत्कृष्ट पॅकिंगसह तयार होणाऱ्या या उपक्रमाची नोंद गिनीज बुक ऑफ रेकॉर्ड, लिम्का बुक ऑफ रेकॉर्ड आणि लंडन बुक ऑफ रेकॉर्डमध्येही झाली आहे.
यंदा दुष्काळाच्या पार्श्वभूमीवर सामाजिक बांधिलकी जपत ‘दि पूना मर्चंट्स चेंबर’ने अडचणीत असलेल्या शेतकरी कुटुंबांनाही मदतीचा हात दिला आहे. राज्यातील दुष्काळग्रस्त शेतकऱ्यांसाठी ५ हजार किलो लाडू-चिवडा मोफत वितरित केला जाणार असून, देशाच्या सीमेवर कार्यरत सैनिकांसाठीही २ हजार किलो फराळ पाठविण्यात येणार आहे. राजस्थानचे पप्पू महाराज यांच्या मार्गदर्शनाखाली फराळ तयार करण्याचे काम सुरू असून, या उपक्रमामुळे महिला आणि पुरुष कामगारांना मोठ्या प्रमाणात रोजगारही उपलब्ध झाला आहे. नागरिकांना कमी किमतीत दर्जेदार फराळ उपलब्ध करून देतानाच समाजातील गरजू घटकांपर्यंत दिवाळीचा आनंद पोहोचवण्याचा हा उपक्रम दरवर्षीप्रमाणे यंदाही सामाजिक जबाबदारीचे उदाहरण ठरत आहे.