विक्रोळी : मुंबईच्या पूर्व उपनगरातील विक्रोळी येथून एक धक्कादायक घटना पुढे आली आहे. एका २५ वर्षीय तरुणीने इमारतीच्या २२ व्या मजल्यावरून उडी टाकून आत्महत्या केली. विक्रोळीतील कन्नमवार नगर येथील इमारत क्रमांक ९७ मध्ये हा प्रकार घडला. आत्महत्या करणाऱ्या तरुणीचे नाव हर्षदा तांदोलकर (वय २५) असे आहे. या घटनेमुळे विक्रोळी परिसरात एकच खळबळ उडाली आहे.
ही घटना सोमवारी रात्री घडली. हर्षदाने इमारतीच्या २२ व्या मजल्यावर असलेल्या टेरेसवर जाऊन खाली उडी टाकली. ही घटना अत्यंत भयंकर असल्याचे प्रत्यक्षदर्शीने सांगितले आहे. इतक्या उंचावरून खाली पडल्यामुळे या तरुणीच्या शरीराचे दोन तुकडे झाले आणि तिचा जागीच मृत्यू झाला. हे दृश्य अंगावर अक्षरश: काटा आणणारे होते. स्थानिकांनी या घटनेची माहिती पोलिसांनी दिली. त्यांनतर पोलिसांनी घटनास्थळी येत पंचनामा करून तरुणीचा मृतदेह ताब्यात घेतला आहे. या तरुणीने नक्की कोणत्या कारणामुळे आत्महत्या केली, तिला कोणता मानसिक किंवा शारीरिक त्रास होता का? हे अद्याप स्पष्ट झालेले नाही आहे. पोलिसांकडून याचा तपास केला जात आहे. मात्र या घटनेमुळे नव्याने विकसित होणाऱ्या आणि उंच इमारतींचा परिसर अशी नवी ओळख धारण केलेल्या कन्नमवार नगरमध्ये खळबळ उडाली आहे. आता पोलिसांच्या तपासातून काय निष्पन्न होणार, याकडे सर्वांच्या नजरा लागल्या आहेत.