पिंपरी- चिंचवड : येथील जेष्ठ व्यवसायिकाच्या तोंडावर मिर्चीपूड फेकून मनी ट्रान्सफरचे २७ लाख २५ हजार रुपये घेऊन पसार झालेल्या चार जणांना पिंपरी- चिंचवड पोलिसांनी अटक केली आहे. त्यांच्याकडून ११ लाख ३५ हजार रक्कम हस्तगत करण्यात आली आहे. या घटनेप्रकरणी व्यवसायिक प्रकाश भिकचंद लोढा यांनी निगडी पोलीस ठाण्यात तक्रार दिली होती. विशाल साहेबराव जगताप, जावेद अकबर काझी, अभिषेक दयानंद बोडके आणि धिरेंद्रसिंग असवानी सिंग यांना पोलिसांनी अटक केली असून लालबाबू बाजीलाल जयस्वाल हा फरार आहे. त्याचा शोध पोलीस घेत आहेत.
पोलिसांनी दिलेल्या माहितीनुसार, तक्रारदार जेष्ठ व्यवसायिक प्रकाश लोढा यांना गेल्या आठवडयात रात्री पावणे अकाराच्या सुमारास लुटण्यात आले होते. त्यांच्या तोंडाला मिर्ची पावडर चोळून मनी ट्रान्सफर चे २७ लाख २५ हजार रुपये घेऊन आरोपी पसार झाले होते. लोढा हे तीन ठिकाणची मनी ट्रान्सफर ची एकूण रक्कम २७ लाख २५ हजार रोख रक्कम गोळा करून स्कुटर वरून राहते घरी दुर्गानगर येथे जात असताना पाठीमागून दुचाकीवर आलेल्या दोघांनी स्कुटरला धक्का देऊन त्यांच्या चेहऱ्यावर मिरची पावडर टाकली आणि धक्का- बुक्की करत लाखोंची रक्कम घेऊन पसार झाले. या प्रकरणी निगडी पोलीस ठाण्यात गुन्हा दाखल करण्यात आला होता. घटनेचे गांभीर्य ओळखून सर्व युनिट आणि गुन्हे शाखा यांना गुन्ह्याचा समांतर तपास करण्याचे आदेश दिले होते. तपास सुरू असताना गुन्हे शाखा युनिट एकचे पोलिस निरीक्षक संतोष पाटील, वरिष्ठ पोलीस निरीक्षक शैलेश गायकवाड, दरोडा, खंडणी विरोधी पथक यांनी वेगवेगळे पथके तयार करून आरोपीचा शोध घेत होते. अखेर खबऱ्या मार्फत पोलीस आरोपीपर्यंत पोहचले. चार ही आरोपींना वेगवेगळ्या ठिकाणाहून पोलिसांनी बेड्या ठोकल्या आहेत. त्यांच्याकडून ११ लाख ३५ हजार रोख रक्कम हस्तगत केली आहे. ही कामगिरी पोलिस आयुक्त विनयकुमार चौबे यांच्या मार्गदर्शनाखाली करण्यात आली.
