अंबरनाथ : किडनीच्या आजाराने त्रस्त असलेल्या अंबरनाथ पश्चिमेतील एक २३ वर्षीय तरुणी आणि तिच्या कुटुंबीयांची एका व्यक्तीने प्रत्यारोपणासाठी तत्काळ किडनी उपलब्ध करून देण्याच्या नावाखाली दोन लाख ९८ हजार रुपयांची आर्थिक फसवणूक केल्याचा प्रकार समोर आला आहे. अमय प्रेमचंद उपाध्याय असे या आरोपीचे नाव असून या प्रकरणी अंबरनाथ पोलिस स्टेशनमध्ये गुन्हा दाखल करण्यात आला आहे. अंबरनाथ पश्चिमेतील बुवापाडा येथील एक तरुणी किडनीच्या विकाराने ग्रस्त आहे. तिच्यावर मुंबईच्या केईएम रुग्णालयात उपचार सुरू होते. केईएम रुग्णालयातच या तरुणीसोबत अंबरनाथ पश्चिमेतील सृष्टी हिल परिसरात राहणार अमय प्रेमचंद उपाध्याय याचा परिचय झाला. या तरुणीसाठी कुटुंबीयांची किडनी प्रत्यारोपणासाठी धावपळ सुरू असल्याचे त्याच्या लक्षात आले. त्याने प्रत्यारोपणासाठी किडनी उपलब्ध करून देण्याचे आश्वासन दिले.
त्यानंतर त्याने एप्रिल ते मे या दरम्यान दोन लाख ९८ हजार रुपये वेळोवेळी ऑनलाइनच्या माध्यमातून उकळले, मात्र बराच काळ लोटूनही अमय किडनी उपलब्ध करून देत नव्हता. दिलेल्या पैशांची मागणी केली असता, पैसेही परत करत नव्हता. आपली आर्थिक फसवणूक झाल्याचे लक्षात आल्यावर त्यांनी अंबरनाथ पोलिस स्टेशनमध्ये धाव घेतली. आरोपी उपाध्याय याच्याविरोधात गुन्हा दाखल करण्यात आला आहे. आरोपीचा पोलिस शोध घेत असून त्याने या प्रकारे आणखी काही नागरिकांची फसवणूक केली आहे का, याचाही पोलिस तपास करत असल्याची माहिती अंबरनाथ पोलिस स्टेशनचे वरिष्ठ पोलिस निरीक्षक जगन्नाथ कळसकर यांनी दिली.
