ससूनमध्ये ललित पाटील पलायनानंतर उरला केवळ एक कैदी रुग्ण

ससूनमध्ये महिन्याला सरासरी १५ कैदी रुग्ण येरवडा कारागृहातून उपचारासाठी दाखल होतात. या महिन्यात केवळ दोन कैदी रुग्ण उपचारासाठी दाखल झाले. त्यातील एक कैदी ११ ऑक्टोबरला दाखल झाला. त्याची मानसिक तपासणी करावयाची होती. त्याला २५ ऑक्टोबरला पुन्हा पाठविण्यात आले. याचबरोबर एक महिला कैदी २१ ऑक्टोबरला दाखल झाली. तिचा गर्भपात करावयाचा होता. तो झाल्यानंतर तिला २६ ऑक्टोबरला कारागृहात पाठविण्यात आले. त्यामुळे येरवडा कारागृहातून सूसनमध्ये कैदी पाठविण्याचे प्रमाण कमी झाल्याचे समोर आले आहे. त्याच वेळी कैदी दाखल करून घेण्याचे प्रमाणही ससून प्रशासनाने कमी केले आहे. ललित पाटीलवर खुद्द अधिष्ठाता डॉ. संजीव ठाकूर यांच्याकडून उपचार सुरू होते. त्याच्यावर आधी क्षयरोग आणि नंतर हर्नियाचे उपचार सुरू होते. नंतर ठाकूर यांनी ललितची लठ्ठपणाची शस्त्रक्रिया करण्याचा निर्णय घेतला. याबाबतचे पत्र त्यांनी वैद्यकीय अधीक्षकांना पाठवले होते. हे पत्र आता समोर आल्याने अधिष्ठात्यांनीच ललितचा रुग्णालयातील मुक्काम वाढविल्याचा आरोप केला जात आहे.

ससूनमधील कैदी रुग्णांवरील उपचार

• दरमहा १५ कैदी दाखल होत असताना या महिन्यात केवळ २ दाखल
• कैदी रुग्ण कक्ष क्रमांक १६ मध्ये सध्या केवळ एकच रुग्ण
• येरवडा कारागृहातून ससूनला पाठवल्या जाणाऱ्या रुग्णांचे प्रमाण कमी
• ससून प्रशासनाकडून कैदी रुग्ण दाखल करून घेण्याचेही प्रमाण कमी
• कैदी रुग्ण कक्षात जाणाऱ्या डॉक्टर, कर्मचाऱ्यांची प्रत्येकी वेळी नोंद