नवी मुंबई : पनवेलमध्ये नोव्हेंबर १९९४ मधील एका हत्याप्रकरणातील फरार असलेल्या आरोपीला पनवेल शहर पोलिसांनी पंजाबमधील अमृतसर येथून दहा दिवसांच्या शोध मोहिमेनंतर अटक केली. बिट्टुसिंग अर्जुनसिंग असे या आरोपीचे नाव असून तो अमृतसर येथे बलविंदरसिंग दर्शनसिंग असे नाव बदलून राहत होता. आरोपीचे छायाचित्र अथवा मोबाइल क्रमांक उपलब्ध नसतानाही, पोलिसांनी त्याची माहिती काढून तब्बल ३० वर्षांनंतर त्याला गजाआड केल्याची माहिती परिमंडळ- २ चे पोलिस उपायुक्त पंकज डहाणे यांनी दिली.
अटक करण्यात आलेला आरोपी बिट्टूसिंग अर्जुनसिंग मजबी व त्याचे साथीदार बलविंदरसिंग अमरसिंग मजबी व बाऊसिंग अर्जुनसिंग गौरास या तिघांनी नोव्हेंबर १९९४ मध्ये काशमीरासिंग अजितसिंग विर्क उर्फ जाट (३८) याच्या डोक्यात लोखंडी सळीने प्रहार करून त्याची हत्या केली होती. मृत काशमीरासिंग याने मजबी याला चालकाच्या नोकरीतून काढून टाकल्याचा राग मनात धरून ही हत्या करून, या तिघांनी पलायन केले होते. त्यावेळी पनवेल शहर पोलिस ठाण्यात हत्येचा गुन्हा दाखल करण्यात आला होता. तेव्हापासून आरोपी फरार होते.
परिमंडळ-२चे पोलिस उपायुक्त पंकज डहाणे यांनी अभिलेखावरील हत्येच्या गुन्ह्यातील फरार आरोपींची विशेष शोध मोहीम राबवण्याचे आदेश दिले होते. त्यानुसार, पनवेल शहर पोलिस ठाण्याचे वपोनि नितीन ठाकरे यांनी १९९४मधील या हत्येतील फरार आरोपींच्या शोधासाठी विशेष तपास पथक तयार केले होते. या पथकाने या गुन्ह्यातील आरोपीचे कोणतेही छायाचित्र अथवा मोबाइल क्रमांक उपलब्ध नसताना, आरोपीबाबत माहिती संकलित केली. त्यानंतर, पोलिसांच्या पथकाने गोपनीय सूत्रांकडून माहिती काढली असता, आरोपींपैकी आरोपी गौरास हा मरण पावल्याचे तसेच आरोपी बिट्टुसिंग अर्जुनसिंग हा त्याचे नाव बदलून बलविंदरसिंग दर्शनसिंग या नावाने राहत असल्याची माहिती मिळाली. गुन्हा ३० वर्षांपूर्वीचा असल्याने पोलिसांनी अमृतसर येथील स्थानिक पोलिस ठाण्यातील सेवानिवृत्त अधिकाऱ्यांशी समन्वय साधून दहा दिवसांच्या शोधमहिमेनंतर अमृतसरमधून आरोपी बिट्टुसिंग अर्जुनसिंग याला ताब्यात घेतले.