पुणे : ‘मुख्यमंत्री माझी लाडकी बहीण योजना’नंतर आता महाराष्ट्र सरकारचा भर एकल महिलांच्या सक्षमीकरणावर असल्याचे संकेत मिळाले आहेत. राज्यातील एकल महिलांसाठी स्वतंत्र योजना आणण्याची तयारी सुरू असून, उच्च व तंत्रशिक्षण मंत्री चंद्रकांत पाटील यांनी याबाबत महत्त्वाची माहिती दिली. अखिल भारतीय पत्रकार संघ आणि महाराष्ट्र राज्य डिजिटल मीडिया, मुंबई यांच्या वतीने आयोजित कार्यक्रमात बोलताना त्यांनी सांगितले की, राज्यातील शाळा आणि महाविद्यालयांमध्ये वडील नसलेल्या विद्यार्थ्यांची माहिती संकलित करण्याचे काम सुरू करण्यात आले आहे. या सर्वेक्षणाच्या आधारे एकल महिलांची परिस्थिती, त्यांच्या अडचणी आणि गरजा लक्षात घेऊन नवीन योजना तयार केली जाणार आहे. महिलांवर कुटुंबाची जबाबदारी एकहाती येत असून, अनेक महिला अत्यंत प्रतिकूल परिस्थितीतही संसार सांभाळत असल्याचे त्यांनी नमूद केले. अशा महिलांना आर्थिक आणि सामाजिक आधार मिळावा, हा सरकारचा उद्देश असल्याचेही त्यांनी स्पष्ट केले.
चंद्रकांत पाटील यांनी सांगितले की, आतापर्यंत झालेल्या सर्वेक्षणात सुमारे ३ लाख एकल महिलांची माहिती समोर आली असून, हे काम अद्याप सुरू आहे. राज्यात १२ लाखांहून अधिक एकल महिला असल्याचा प्राथमिक अंदाज असून, अधिक माहिती संकलित केल्यानंतर योजनेचा अंतिम आराखडा तयार केला जाईल. विशेषतः ज्या विद्यार्थ्यांच्या वडिलांचे निधन झाले आहे किंवा जे वडिलांविना शिक्षण घेत आहेत, अशा कुटुंबांना या योजनेचा लाभ देण्यावर सरकारचा भर असेल, असे त्यांनी सांगितले. दरम्यान, पुण्यात विविध क्षेत्रांत उल्लेखनीय कार्य करून समाजाच्या विकासात योगदान देणाऱ्या व्यक्तींच्या सन्मानार्थ आयोजित राज्यस्तरीय पुरस्कार सोहळ्यात त्यांनी ही माहिती जाहीर केली. ‘मुख्यमंत्री माझी लाडकी बहीण योजना’ला राज्यभरातून मोठा प्रतिसाद मिळाल्यानंतर आता एकल महिलांसाठी आणली जाणारी ही नवी योजना त्यांच्या आर्थिक, शैक्षणिक आणि सामाजिक सक्षमीकरणासाठी महत्त्वाची ठरण्याची शक्यता व्यक्त केली जात आहे.
