मुंबई : ससून डॉक आणि जमशेदजी बंदर परिसरातील समुद्रातील तरंगता कचरा यांत्रिक पद्धतीने हटविण्यासाठी आणखी दोन मानवरहित बोटी तैनात करण्यात येणार आहेत. या बोटींचा पुरवठा, संचालन आणि देखभाल करण्यास मुंबई महापालिका आयुक्त अश्विनी भिडे यांनी मंजुरी दिली आहे. या प्रकल्पासाठी महापालिकेने ३.६४ कोटी रुपयांची तरतूद केली आहे.
मुंबईतील प्रमुख बंदर परिसरातील प्लास्टिक आणि प्रदूषण कमी करण्यासाठी महापालिका व बंदर प्राधिकरणांकडून सुरू असलेल्या पर्यावरण स्वच्छता मोहिमेअंतर्गत हा उपक्रम राबविण्यात येत आहे. स्वयंचलित किंवा दूरस्थ पद्धतीने नियंत्रित करता येणाऱ्या विद्युत आणि सौरऊर्जेवर चालणाऱ्या बोटी समुद्रातील तरंगता कचरा गोळा करणार आहेत. महापालिकेने याच वर्षी मे महिन्यात गेटवे ऑफ इंडिया आणि बधवार पार्क येथे दोन मानवरहित विद्युत बोटी तैनात केल्या होत्या. कुलाबा येथील भाजप नगरसेवक मकरंद नार्वेकर यांच्या माहितीनुसार, या बोटी दररोज सुमारे ८० ते ९० किलो तरंगता कचरा गोळा करीत आहेत. महापालिकेचा घनकचरा व्यवस्थापन विभाग निविदेच्या अटी व शर्ती निश्चित करीत असून, लवकरच निविदा काढण्यात येणार आहेत. मनुष्यबळाच्या तुलनेत यांत्रिक पद्धतीने कचरा संकलन अधिक वेगाने करता येते. गोळा केलेल्या कचऱ्याचे वर्गीकरण करून तो पुनर्वापरासाठी पाठविला जातो. या बोटींची कार्यकक्षा सुमारे ५०० मीटर असून त्या बॅटरीवर चालतात. त्यावर सौर पॅनेलही बसविण्यात आले आहेत. किनारपट्टी स्वच्छतेसाठी आधुनिक तंत्रज्ञानाचा वापर करणारी मुंबई महापालिका देशातील पहिली महापालिका ठरली आहे.
