मुंबई : महाराष्ट्रासह देशभरात साखरेच्या दरात मोठी वाढ झाल्याने बाजारात तुटवड्याची परिस्थिती निर्माण झाली आहे. आगामी सणासुदीच्या पार्श्वभूमीवर साखरेची मागणी वाढत असताना पुरवठा कमी पडत असल्याने गेल्या दोन महिन्यांत किरकोळ बाजारातील साखरेच्या किमती सुमारे ४० टक्क्यांनी वाढल्या आहेत. या पार्श्वभूमीवर ग्राहकांकडून होणारी साठेबाजी रोखण्यासाठी आणि उपलब्ध साखर अधिकाधिक ग्राहकांपर्यंत पोहोचावी यासाठी प्रमुख रिटेल व ई-कॉमर्स कंपन्यांनी खरेदीवर मर्यादा लागू करण्यास सुरुवात केली आहे. डी-मार्ट, बिग बास्केट, ब्लिंकिट आणि स्विगी इन्स्टामार्टसारख्या कंपन्यांनी एका व्यवहारात किंवा एका ग्राहकाला ठरावीक प्रमाणातच साखर खरेदी करता येईल, असे धोरण स्वीकारले आहे. साखरेच्या वाढत्या किमतींचा परिणाम केवळ घरगुती ग्राहकांवरच नव्हे, तर पॅकेज्ड फूड, मिठाई, बेकरी आणि खाद्यपदार्थ उद्योगावरही होत आहे. साखरेबरोबरच खाद्यतेलाचे दरही वाढत असल्याने अनेक कंपन्यांच्या उत्पादन खर्चात वाढ झाली आहे. त्यामुळे स्नॅक्स, बिस्किटे, मिठाई आणि इतर प्रक्रिया केलेल्या खाद्यपदार्थांच्या किमती येत्या काळात ५ ते ६ टक्क्यांनी वाढण्याची शक्यता वर्तवली जात आहे. एका प्रमुख स्नॅक्स उत्पादक कंपनीच्या अधिकाऱ्यांनी कच्च्या मालाच्या वाढत्या खर्चामुळे दरवाढ अपरिहार्य असल्याचे सांगितले आहे. साखरेचे दर आणखी वाढल्यास खाद्यतेल आणि इतर उत्पादनांच्या किमतींवरही त्याचा परिणाम होण्याची शक्यता व्यक्त करण्यात येत आहे.
साखरेच्या किमती नियंत्रणात ठेवण्यासाठी केंद्र सरकारने नुकतीच १० लाख टन साखर आयात करण्यास मंजुरी दिली असली तरी स्थानिक बाजारात त्याचा परिणाम दिसण्यासाठी काही काळ लागणार आहे. तोपर्यंत उपलब्ध साठ्याचे योग्य नियोजन करण्यासाठी रिटेल कंपन्यांनी खरेदीवर मर्यादा लागू केल्या आहेत. अहवालानुसार, अनेक कंपन्या एका ग्राहकाला प्रति व्यवहार केवळ ३ ते ५ किलो साखर खरेदी करण्याची परवानगी देत आहेत. एडब्ल्यूएल ॲग्रीबिझनेसचे कार्यकारी उपाध्यक्ष अंगसू मल्लिक यांनी प्रत्येक ग्राहकाला साखर उपलब्ध व्हावी आणि कृत्रिम तुटवडा निर्माण होऊ नये, यासाठीच हे धोरण स्वीकारल्याचे स्पष्ट केले आहे. विविध शहरांमध्येही या मर्यादा लागू करण्यात आल्या आहेत. दिल्ली-एनसीआरमध्ये ब्लिंकिटवर मावाना आणि धामपूर ब्रँडच्या साखरेसाठी एका व्यवहारात केवळ ५ किलोचा एक पॅक खरेदी करता येत असून, मर्यादित साठ्याची सूचना ॲपवर दर्शवली जात आहे. स्विगी इन्स्टामार्टवर सुप्रीम हार्वेस्ट आणि मधुर ब्रँडच्या १ किलोच्या फक्त दोन पॅकचीच खरेदी करता येत आहे. पुण्यात ब्लिंकिटवर ग्राहकांना एका वेळी १ किलोचे केवळ तीन पॅक घेण्याची परवानगी आहे, तर बिग बास्केटने प्रति ग्राहक ५ किलोची मर्यादा निश्चित केली आहे. सणासुदीच्या काळात वाढत्या मागणीमुळे साखरेचा पुरवठा सुरळीत होईपर्यंत अशा प्रकारच्या मर्यादा कायम राहण्याची शक्यता असून, ग्राहकांनी अनावश्यक साठेबाजी टाळून आवश्यकतेनुसारच खरेदी करण्याचे आवाहन व्यापारी आणि तज्ज्ञांकडून करण्यात येत आहे.
