मुंबई : वाढत्या वाहनसंख्येमुळे निर्माण होणारी वाहतूक कोंडी कमी करण्यासाठी आणि सार्वजनिक वाहनतळांचा वापर वाढवण्यासाठी मुंबई महानगरपालिकेने दादर पश्चिम येथील जे. के. सावंत मार्गावरील सार्वजनिक वाहनतळ ‘मॉडेल वाहनतळ’ म्हणून विकसित करण्याचा निर्णय घेतला आहे. या उपक्रमांतर्गत स्थानिक नागरिकांना वाहनतळाचा वापर करण्यासाठी प्रोत्साहन देण्याच्या उद्देशाने मासिक पासवर ५० टक्के सवलत जाहीर करण्यात आली आहे. पहिल्या टप्प्यात अशा सवलतीचे ४०० पास उपलब्ध करून देण्यात आले असून मागणीनुसार पुढील निर्णय घेतला जाणार आहे. याशिवाय वाहनचालकांच्या सोयीसाठी व्हॅलेट पार्किंग सुविधा उपलब्ध करून देण्याचाही विचार सुरू असल्याची माहिती अतिरिक्त आयुक्त अभिजित बांगर यांनी दिली. महानगरपालिका आयुक्त आश्विनी भिडे यांच्या मार्गदर्शनाखाली हा उपक्रम राबविण्यात येत असून, संपूर्ण मुंबईत विकसित करण्यात आलेल्या ३७ वाहनतळांमधून सुमारे ३० हजार १३५ वाहनांच्या पार्किंगची सुविधा उपलब्ध आहे. जे. के. सावंत मार्गावरील वाहनतळात एक हजार तीनचाकी व चारचाकी तसेच १२ दुचाकी वाहनांसाठी पार्किंगची व्यवस्था करण्यात आली आहे.
वाहनतळ अधिक सुरक्षित, स्वच्छ आणि आकर्षक करण्यासाठी विविध उपाययोजना राबविण्यात आल्या आहेत. अतिरिक्त ट्यूबलाइट्स, सीसीटीव्ही कॅमेरे, दिशादर्शक फलक तसेच स्वच्छता मोहिमेद्वारे वाहनतळाचे रूप पालटण्यात आले आहे. महिला वाहनचालकांच्या सुरक्षेसाठीही विशेष व्यवस्था करण्यात आली आहे. कोतवाल गार्डन परिसर, कबुतरखाना, गणेश पेठ गल्ली तसेच टी. आर. सावंत मार्ग ते बाळ गोविंददास मार्ग हा परिसर ‘नो पार्किंग’ क्षेत्र म्हणून घोषित करण्यात आला असून येथे २०० हून अधिक फलक लावण्यात आले आहेत. ‘नो पार्किंग’ क्षेत्र अधिक स्पष्ट दिसावे यासाठी रस्त्यांवरील दगडी कडांना लाल व काळ्या रंगाचे पट्टे रंगविले जात आहेत, तर सम-विषम दिनांकानुसार पार्किंगसाठी लाल आणि पांढऱ्या रंगाच्या खुणाही करण्यात येत आहेत. या सर्व उपाययोजनांच्या पार्श्वभूमीवर १ जुलै २०२६ पासून ‘नो पार्किंग’ क्षेत्रात अथवा अन्य प्रतिबंधित ठिकाणी वाहने उभी केल्यास वाहतूक पोलिसांमार्फत दंडात्मक कारवाई केली जाणार आहे. या उपक्रमाला नागरिकांचा चांगला प्रतिसाद मिळाल्यास मुंबईतील इतर भागांमध्येही अशाच प्रकारच्या योजना राबविण्यात येणार असल्याचे प्रशासनाने स्पष्ट केले आहे.
