नवी दिल्ली : वाढत्या महागाईचा परिणाम आता सलून व्यवसायावरही स्पष्टपणे दिसू लागला आहे. इंधन दरवाढ, महाग झालेली सौंदर्यप्रसाधने तसेच वाढलेला दैनंदिन व्यवसाय खर्च यामुळे महाराष्ट्र नाभिक महामंडळाने सलून सेवांच्या दरात २० टक्के वाढ करण्याचा निर्णय घेतला आहे. ही नवीन दरवाढ आजपासून राज्यभरात लागू करण्यात आली असून ग्राहकांना केस कापणे, दाढी करणे, हेअर कलर, फेशियल, हेअर ट्रिटमेंट आणि मेकअपसह विविध सेवांसाठी अधिक पैसे मोजावे लागणार आहेत. शॅम्पू, हेअर कलर, जेल, वॅक्स यांसारख्या आवश्यक साहित्यांच्या किमतीत मोठी वाढ झाल्याने सलून व्यावसायिकांवरील आर्थिक ताण वाढला आहे. व्यवसाय टिकवून ठेवणे आणि कारागिरांचा उदरनिर्वाह सुनिश्चित करण्यासाठी ही दरवाढ अपरिहार्य असल्याचे नाभिक महामंडळाने स्पष्ट केले आहे. वाढती वीजबिले, दुकानांचे भाडे, स्थानिक कर आणि कर्जाचे हप्ते यांमुळे ग्रामीण तसेच शहरी भागातील सलून व्यावसायिक आर्थिक अडचणीत सापडल्याचेही सांगण्यात आले आहे.
नवीन दरांनुसार प्रीमियम सलूनमध्ये दाढीसाठी २०० ते ५०० रुपये, कटिंगसाठी ५०० ते १००० रुपये, हेअर कलरसाठी ७०० ते १००० रुपये आणि फेशियलसाठी २००० ते ३००० रुपये आकारले जाणार आहेत. एसी सलूनमध्ये दाढीचे दर १०० ते २०० रुपये, कटिंगचे १५० ते ३५० रुपये, तर हेअर कलरचे ३०० ते ५०० रुपये असतील. ग्रामीण भागातील सलूनमध्ये दाढीसाठी ५० ते ७० रुपये, कटिंगसाठी ८० ते १०० रुपये आणि हेअर कलरसाठी ८० ते १०० रुपये शुल्क आकारले जाईल. याशिवाय हेअर ट्रिटमेंट, ब्रायडल मेकअप आणि ग्रुम मेकअपच्या दरांतही वाढ करण्यात आली आहे. सलून व्यावसायिकांच्या मते, अनेक वर्षे कमी नफ्यात व्यवसाय चालविल्यानंतर वाढत्या खर्चामुळे दरवाढ करणे आवश्यक झाले होते. मात्र या निर्णयामुळे सर्वसामान्य ग्राहकांच्या खिशावर अतिरिक्त भार पडणार असून, वाढत्या महागाईच्या काळात सलून सेवांचा खर्चही लक्षणीयरीत्या वाढणार आहे.
