पुणे : राज्यातील पालकांवर शैक्षणिक खर्चाचा वाढता ताण असतानाच आता स्कूलबस सेवेसाठीही अधिक पैसे मोजावे लागणार आहेत. स्कूलबस ओनर्स असोसिएशनने (एसबीओए) राज्यभरातील स्कूलबस वाहतूक सेवांच्या शुल्कात १५ टक्के वाढ करण्याचा निर्णय जाहीर केला असून ही दरवाढ जून महिन्यापासून लागू करण्यात आली आहे. यामुळे हजारो विद्यार्थ्यांच्या पालकांच्या मासिक खर्चात वाढ होणार आहे. यंदा शाळांची फी, वह्या-पुस्तके, गणवेश आणि इतर शैक्षणिक साहित्याच्या किमती वाढल्याने पालक आधीच आर्थिक ताणाखाली आहेत. अशा परिस्थितीत स्कूलबस शुल्कवाढीमुळे त्यांच्या अडचणीत आणखी भर पडणार आहे. विशेषतः एका कुटुंबातील दोन किंवा अधिक मुले स्कूलबसने प्रवास करत असतील, तर त्याचा आर्थिक परिणाम अधिक जाणवणार आहे.
स्कूलबस मालक संघटनेच्या मते, डिझेलसह इतर इंधनाच्या वाढलेल्या किमती, चालक आणि कर्मचाऱ्यांच्या वेतनातील वाढ, वाहनांची देखभाल व दुरुस्ती खर्च, सुटे भाग, विमा, फिटनेस शुल्क, टोल आणि परवाना शुल्क यांमुळे वाहतूक व्यवसायाचा खर्च मोठ्या प्रमाणात वाढला आहे. याशिवाय ई-चलन आणि विविध दंडांचाही अतिरिक्त आर्थिक भार बस मालकांना सहन करावा लागत आहे. शुल्कवाढ टाळण्यासाठी संघटनेने सरकारकडे कर आणि विविध शुल्कांमध्ये सवलत देण्याची मागणी केली होती. तसेच काही दिवस ऑनलाइन शिक्षणाचा पर्याय विचारात घेण्याची सूचनाही करण्यात आली होती. मात्र या मागण्यांवर कोणताही निर्णय न झाल्याने शुल्कवाढ लागू करण्याचा निर्णय घेण्यात आल्याचे संघटनेचे अध्यक्ष अनिल गर्ग यांनी स्पष्ट केले. या निर्णयामुळे शालेय वाहतुकीसाठी स्कूलबसवर अवलंबून असलेल्या कुटुंबांमध्ये चिंता व्यक्त केली जात असून, वाढत्या शैक्षणिक खर्चामुळे पालकांच्या खिशाला आणखी कात्री लागणार आहे.
