मुंबई : आगामी ईद अल-अजहा सणाच्या पार्श्वभूमीवर मुंबईतील बकरी बाजारात मोठी हालचाल सुरू झाली असून यंदा बकऱ्यांचे दर वाढण्याची शक्यता व्यक्त केली जात आहे. इंधन तेलाच्या वाढत्या किमतीमुळे वाहतूक खर्च वाढला असून जागतिक आर्थिक मंदीचाही परिणाम बकरी व्यवसायावर होत असल्याचे व्यापाऱ्यांचे म्हणणे आहे. बकरी ईदला अवघे चार दिवस उरले असताना मुस्लिम बांधवांकडून कुर्बानीसाठी बकऱ्यांची मोठ्या प्रमाणात खरेदी सुरू झाली आहे. मात्र, वाढलेले वाहतूक खर्च, बाजारातील कमी आवक आणि व्यवस्थापनाचा वाढलेला खर्च यामुळे यंदा ग्राहकांना जास्त पैसे मोजावे लागू शकतात. मुंबई महानगरपालिकेच्या देवनार कत्तलखाना येथे दरवर्षीप्रमाणे यंदाही मोठ्या प्रमाणात बकऱ्यांची आवक होत आहे. मात्र मागील वर्षाच्या तुलनेत यंदा सुमारे ५० हजार बकऱ्यांची घट झाल्याची माहिती समोर आली आहे.
रविवार (दि.२४) पर्यंत तब्बल १ लाख २४ हजार ६८० बकऱ्यांची आरोग्य तपासणी करण्यात आली. प्रशासनाकडून येथे पाणी, वीज आणि इतर मूलभूत सुविधा पुरवल्या जात आहेत. प्रत्येक बकऱ्यासाठी व्यापाऱ्याला २१८ रुपये प्रवेश शुल्क भरावे लागते. त्यानंतर बकरे हलवण्यासाठी हमाल आणि दलाल यांना प्रत्येकी १०० रुपये द्यावे लागत असल्याने एका बकऱ्यामागे किमान ४१८ रुपयांचा अतिरिक्त खर्च व्यापाऱ्यांवर येत आहे. याच ठिकाणाहून मुंबईसह मुंबई महानगर प्रदेशात मोठ्या प्रमाणात घाऊक विक्री केली जाते. सामान्य दिवसांत देवनार पशुवधगृहात दररोज २० ते ३० हजार बकऱ्यांची आवक होत असते. मात्र बकरी ईदच्या काळात ही संख्या मोठ्या प्रमाणात वाढते. सुमारे १ लाख १० हजार ७४० चौरस मीटर परिसर असलेल्या या ठिकाणी अतिरिक्त मंडप उभारण्यात आले आहेत. देवनारसह जोगेश्वरी आणि मीरा रोड भागातही बकऱ्यांची विक्री सुरू असली तरी सर्वाधिक व्यापार देवनारमध्येच होत असल्याचे व्यापाऱ्यांनी सांगितले. सध्या बाजारात २० किलोपासून ते ६० किलो वजनाच्या बकऱ्या उपलब्ध आहेत. त्यानुसार दरही मोठ्या प्रमाणात बदलत आहेत. २० किलो वजनाच्या बकऱ्यांची किंमत सुमारे २५ हजार रुपये आहे, तर २५ किलोसाठी ३० हजार रुपये मोजावे लागत आहेत. ४० किलो वजनाच्या बकऱ्यांचा दर ४५ हजार रुपये असून ४५ किलोसाठी जवळपास ५० हजार रुपये किंमत आहे. विशेष प्रजातीच्या ६० किलो वजनाच्या बकऱ्यांसाठी तब्बल ८० हजार रुपयांपर्यंत मागणी होत आहे. व्यापाऱ्यांच्या मते, सण जसजसा जवळ येईल तसतसे दर आणखी वाढण्याची शक्यता नाकारता येत नाही.
