विरार : वसई तालुक्यातील झपाट्याने वाढणारे नागरीकरण आणि प्रशासकीय कामाचा वाढता व्याप लक्षात घेऊन शासनाने नालासोपारा येथे नवे ‘अपर तहसील कार्यालय’ सुरू करण्याचा महत्त्वपूर्ण निर्णय घेतला आहे. नालासोपारा पश्चिमेकडील श्रीप्रस्थ येथील शासकीय इमारतीमध्ये हे कार्यालय प्रस्तावित असून, यामुळे वसई येथील मुख्य तहसील कार्यालयावरील ताण कमी होणार आहे. मागील काही वर्षात वसई विरार शहराची लोकसंख्या झपाट्याने वाढली आहे.
सध्या केवळ वसई येथेच तहसील कार्यालय असल्याने नालासोपारा आणि विरारमधील शेतकरी, विद्यार्थी व नागरिकांना साध्या कामासाठीही लांबचा प्रवास करावा लागत होता. ही गैरसोय दूर करण्यासाठी नालासोपारा किंवा विरारमध्ये स्वतंत्र कार्यालय असावे, अशी मागणी दीर्घकाळापासून करण्यात येत होती. याबाबत नालासोपारा विधानसभेचे आमदार राजन नाईक यांनी यासंदर्भात महसूल मंत्री चंद्रशेखर बावनकुळे यांच्याकडे सातत्याने पाठपुरावा केला होता. राज्य सरकारच्या महसूल विभागाने गेल्या आठवड्यात सुधारित आकृतीबंधाला मंजुरी दिली असून, त्यानुसार राज्यात विविध ठिकाणी नवीन अपर तहसील कार्यालये मंजूर करण्यात आली आहेत. यामध्ये वसईच्या स्वतंत्र अपर तहसील कार्यालयाचा समावेश करण्यात आला आहे. हे कार्यालय विरार नालासोपारा रस्त्यालगत असलेल्या ‘श्रीप्रस्थ’ या शासकीय इमारतीच्या चौथ्या मजल्यावर हे कार्यालय सुरू करण्याचे प्रशासनाने निश्चित केले असल्याची माहिती वसईचे तहसीलदार डॉ. दीपक गायकवाड यांनी दिली आहे. वसई तालुक्यातील एकूण नऊ महसूल मंडळांपैकी चार मंडळांचे कामकाज आता या नवीन कार्यालयातून चालणार आहे. नालासोपारा येथील कार्यालयात बोळिंज, विरार, आगाशी आणि मांडवी ही चार महसूल मंडळे व त्यांतर्गत येणारी गावं यांचा समावेश असणार आहे. तर वसई तहसीलदार कार्यालयात वसई, कामण, पेल्हार, माणिकपूर आणि निर्मळ ही पाच महसूल मंडळे व त्या अंतर्गत गावांचा समावेश केला आहे.
