ठाणे : ठाण्यातील Domino’s Pizza या नामांकित उपाहारगृहावर शिधावाटप विभागाच्या भरारी पथकाने मोठी कारवाई करत बेकायदेशीर गॅस सिलिंडर साठा उघडकीस आणला आहे. वंडर मॉल परिसरातील या ठिकाणी तळघरात छापा टाकल्यानंतर विविध कंपन्यांचे एकूण १४० सिलिंडर आढळून आले. यामध्ये ५५ भरलेले आणि ८५ रिकामे सिलिंडर होते. या सर्व सिलिंडरची एकूण किंमत सुमारे ४ लाख ५९ हजार ४०० रुपये इतकी असून, प्रशासनाने हा संपूर्ण मुद्देमाल जप्त करून सीलबंद केला आहे. विशेष म्हणजे, हा साठा कोणतीही सुरक्षिततेची नियमावली न पाळता ठेवण्यात आल्याचेही तपासात समोर आले आहे.
ही कारवाई गोपनीय माहितीच्या आधारे नियंत्रक शिधावाटप आणि नागरी पुरवठा विभागाच्या आदेशानुसार करण्यात आली. तपासादरम्यान एचपीसीएल, बीपीसीएल, आयओसी आणि गो गॅस या कंपन्यांचे सिलिंडर आढळले. या प्रकरणी एका संशयित आरोपीला ताब्यात घेऊन Chitalsar Police Station यांच्या स्वाधीन करण्यात आले आहे. आरोपीविरुद्ध जीवनावश्यक वस्तू कायदा १९५५ अंतर्गत गुन्हा दाखल करण्यात आला असून पुढील तपास सुरू आहे. अधिकाऱ्यांच्या मते, अशा प्रकारे नियमबाह्य साठवणूक केल्यामुळे मोठ्या दुर्घटनेचा धोका निर्माण होऊ शकतो, त्यामुळे अशा कारवायांवर कडक नजर ठेवण्यात येणार आहे.
