ठाणे : अभिनयाचं स्वप्न घेऊन मुंबई-ठाण्यात येणाऱ्या तरुणींच्या महत्त्वाकांक्षेला जेव्हा पैशांच्या हव्यासाची आणि चुकीच्या मार्गाची जोड मिळते, तेव्हा काय होते, याचा एक धक्कादायक प्रकार ठाण्यात समोर आला आहे. ज्या अभिनेत्रीला प्रेक्षक वेबसिरीजच्या पडद्यावर पाहत होते, तीच अभिनेत्री पडद्यामागे सेक्स रॅकेटची मास्टरमाइंड निघाली आहे. ठाणे पोलिसांनी एका २६ वर्षीय अभिनेत्रीला अटक केली असून, या कारवाईत चक्क टीव्ही मालिकांमध्ये काम करणाऱ्या दोन महिलांची सुटका करण्यात आली आहे. ठाणे पोलिसांच्या ‘अनैतिक मानवी वाहतूक प्रतिबंध कक्षाला’ (AHTU) एका महिला दलालाबाबत खात्रीशीर माहिती मिळाली होती. ही महिला जादा पैशांचे आमिष दाखवून ग्लॅमर क्षेत्रातील मुलींना देहविक्रयासाठी पुरवत असल्याची कुणकुण पोलिसांना लागली होती. या माहितीची शहानिशा करण्यासाठी पोलिसांनी चक्क एका बनावट ग्राहकाचा सापळा रचला.
पोलिसांनी पाठवलेल्या बनावट ग्राहकाने संबंधित महिलेशी संपर्क साधला. तेव्हा तिने चक्क “आमच्याकडे हिंदी वेबसिरीज आणि टीव्ही मालिकांत काम करणाऱ्या मोठ्या घरच्या मुली आहेत,” असे सांगून काही अभिनेत्रींचे फोटो पाठवले. सौदा पक्का झाल्यानंतर ती दोन महिलांना घेऊन ठाण्यातील वागळे इस्टेट परिसरातील एका आलिशान हॉटेलमध्ये पोहोचली. तिथे आधीच दबा धरून बसलेल्या पोलिसांनी झडप घालून या महिला दलालाला रंगेहात बेड्या ठोकल्या. अटक करण्यात आलेली २६ वर्षीय तरुणी स्वतः एक नवोदित अभिनेत्री आहे. अनेक हिंदी वेबसिरीजमध्ये तिने लहान-मोठ्या भूमिका केल्या आहेत. मुंबईत भाड्याच्या घरात राहणारी ही तरुणी या दलदलीत कशी अडकली, याची कहाणी विदारक आहे. तपासात समोर आले की, मालिका किंवा वेबसिरीजमध्ये नियमित काम मिळत नसल्याने आणि मुंबईसारख्या शहरात राहण्याचा खर्च परवडत नसल्याने तिने हा शॉर्टकट निवडला. स्वतःच्या चैनीच्या सवयी, बहिणीचे शिक्षण आणि गावी आई-वडिलांना पैसे पाठवण्याच्या दबावाखाली ती एका दलालाच्या संपर्कात आली आणि हळूहळू स्वतःच हे रॅकेट चालवू लागली. तिने ४० आणि ४८ वर्षे वयोगटातील दोन महिलांनाही या कामात ओढले होते, ज्या हिंदी मालिकांमध्ये छोट्या-मोठ्या भूमिका करतात. पोलिसांनी या कारवाईत दोन पिडीत महिलांची सुटका केली असून, आरोपी अभिनेत्रीला न्यायालयाने २६ फेब्रुवारीपर्यंत पोलीस कोठडी सुनावली आहे. वागळे इस्टेट पोलीस ठाण्यात याप्रकरणी गुन्हा दाखल करण्यात आला असून, यामागे अजून काही मोठे मासे किंवा सिनेसृष्टीतील इतर कोणाचे हात आहेत का, याचा तपास पोलीस करत आहेत.
