मुंबई : ॲमेझॉन, झोमॅटो, झेप्टो, ब्लिंकिट, स्विगी आणि फ्लिपकार्टसारख्या प्रमुख फूड डिलिव्हरी आणि ऑनलाइन शॉपिंग प्लॅटफॉर्मवरील डिलिव्हरी कर्मचाऱ्यांनी २५ डिसेंबर (आज) आणि ३१ डिसेंबर २०२५ रोजी देशव्यापी संपाची घोषणा केली आहे. कामगार संघटनांचा दावा आहे की, ऑनलाइन डिलिव्हरीचे काम करणाऱ्या कर्मचाऱ्यांची परिस्थिती सतत बिघडत चालली आहे. त्यामुळे या कंपन्यांवर दबाव वाढवण्यासाठी हे पाऊल उचलण्यात आले आहे. तेलंगणा गिग अँड प्लॅटफॉर्म वर्कर्स युनियन आणि इंडियन फेडरेशन ऑफ ॲप-बेस्ड ट्रान्सपोर्ट वर्कर्स यांनी या संपाची घोषणा केली आहे. मेट्रो शहरे आणि प्रमुख टियर-२ शहरांमधील डिलिव्हरी कर्मचारी यात सहभागी होण्याची शक्यता आहे.
कामगार संघटनांचा असा दावा आहे की, वेतन आणि कामाची उद्दिष्टे ठरवणाऱ्या अल्गोरिदमवर प्लॅटफॉर्म कंपन्यांचे अतिशय जास्त नियंत्रण आहे. त्यांचे म्हणणे आहे की, डिलिव्हरीची जोखीम कामगारांवर ढकलली जात आहे. तसेच डिलिव्हरी पोहोचवण्याची कालमर्यादा अधिक कठोर करण्यात येत आहे. याचबरोबर प्रोत्साहन भत्त्याच्या नियमांमध्ये सतत बदल होत आहेत. संप पुकारलेल्या संघटनांनी एका निवेदनात म्हटले आहे की, मागणी जास्त असते तेव्हा आणि सणासुदीच्या काळात ग्राहकांना अन्न आणि पॅकेजेस पोहोचवण्यात महत्त्वाची भूमिका बजावणारे डिलिव्हरी कर्मचारी गंभीर समस्यांना तोंड देत आहेत. यामध्ये घटलेले उत्पन्न, कामाचे जास्त आणि अनिश्चित तास, वर्क आयडी अचानक ब्लॉक करणे आणि कर्मचाऱ्यांसाठी कोणत्याही मूलभूत सुरक्षा किंवा कल्याणकारी योजना नसणे यांचा समावेश आहे. युनियनने तक्रारी हाताळण्यासाठी आणि पेमेंट अयशस्वी होण्याच्या घटना कमी करण्यासाठी ॲप्समध्ये अधिक भक्कम प्रणाली असावी, अशी मागणी केली आहे. कामगारांना निश्चित विश्रांतीची वेळ, आरोग्य विमा, अपघातांच्या बाबतीत संरक्षण आणि पेन्शनसारखे फायदे मिळावेत, अशीही मागणी आहे. याचबरोबर कर्मचाऱ्यांनी १० मिनिटांत डिलिव्हरी देण्याची सेवा बंद करण्याचीही मागणी केली आहे.
