नवी मुंबई : मुंबईतील मानखुर्द येथे राहणाऱ्या एका महिलेने मध्यस्थांच्या मदतीने १७ दिवसांच्या बाळाला अडीच लाख रुपयांमध्ये विकण्याचा प्रयत्न केल्याची धक्कादायक घटना खारघरमध्ये उघडकीस आली आहे. अनैतिक मानवी वाहतूक प्रतिबंधक कक्षाला याबाबतची माहिती मिळाल्यानंतर पथकाने खारघरमध्ये सापळा लावून लहान बाळाला विकण्यासाठी आलेली आई तसेच, बाळ विक्रीसाठी मध्यस्थी करणारे अशा एकूण आठ जणांना अटक केली आहे. या कारवाईत बाळाची आई मुमताज मंडल (२८, रा. मानखुर्द महाराष्ट्र नगर), मध्यस्थ मुमताज खान (४८), नदिम अन्सारी (२९), गुलाम अन्सारी (३७), सुरेश कांबळे (६०) (सर्व रा. मुंब्रा) तसेच, जुबेदा रफिक (४९), शमिरा शेख (४२) (दोघेही रा. चिता कॅम्प ट्रॉम्बे) व दिलशाद आलम (४२) (रा. वांद्रे खेरवाडी) या आठ जणांचा समावेश आहे. ही टोळी लहान मुलांना पळवून नेऊन त्यांची विक्री करत असल्याची माहिती नवी मुंबई पोलिसांच्या अनैतिक मानवी वाहतूक प्रतिबंधक कक्षाला मिळाली होती.
या माहितीच्या आधारे कक्षाने एका महिलेच्या माध्यमातून या टोळीसोबत व्हॉट्सॲपवरून मागील एक महिन्यापासून संपर्क ठेवला होता. या चॅटिंगदरम्यान पोलिसांच्या पथकाने लहान मूल खरेदीबाबत चौकशी केल्यानंतर या टोळीने अडीच लाख रुपयांमध्ये नवजात बाळ विकत देण्याची तयारी दर्शविली होती. त्यानुसार पोलिसांच्या पथकाने त्यांना खारघर येथे बोलावून घेतले होते. त्यानुसार वरिष्ठ पोलिस निरीक्षक अतुल आहेर आणि त्यांच्या पथकाने खारघर सेक्टर २१ मध्ये सापळा लावला होता. मुमताज आणि रिक्षाचालक नदिम आणि बाळाची आई मुमताज हे तिघेही १७ दिवसांच्या बाळाला घेऊन रिक्षामधून खारघरमध्ये आले होते. यावेळी बाळाच्या खरेदी-विक्रीचे अडीच लाख रुपये त्यांना दिल्यानंतर पोलिसांनी तिघांची धरपकड करून त्यांना ताब्यात घेतले. या बाळाच्या विक्रीव्यवहारात इतर पाच जण सहभागी असल्याची आणि ते सर्व मुंब्रा येथे असल्याची माहिती मिळाली. त्यानंतर मुंब्रा येथून इतर पाच जणांनाही ताब्यात घेतले.