धारावीत दोन ड्रग्ज तस्करांना अटक; पावणेदोन कोटींचा एमडी, गांजा जप्त

मुंबई : धारावी परिसरात ड्रग्जची डिलिव्हरी करण्यासाठी आलेल्या दोन तस्करांना कांदिवली युनिटच्या अंमली पदार्थविरोधी पथकाने अटक केली. त्यांच्या ताब्यातून तसेच घरातून पोलिसांनी तब्बल १ कोटी ७६ लाख १६ हजार ९२० रुपयांचा एमडी आणि गांजाचा साठा जप्त केला. या कारवाईत दोन मोबाईलही हस्तगत करण्यात आले आहेत. आरोपींविरुद्ध एनडीपीएस कायद्यानुसार गुन्हा दाखल करण्यात आला आहे. धारावीतील होळी मैदानाजवळ शुक्रवारी सायंकाळी कांदिवली युनिटचे पोलीस गस्त घालत होते. यावेळी दोन संशयित तरुण आढळून आल्याने पोलिसांनी त्यांना चौकशीसाठी ताब्यात घेतले. अंगझडती घेतली असता त्यांच्याकडे सुमारे ६६ लाख रुपये किमतीचा एमडी आढळून आला. चौकशीत दोघेही धारावी परिसरात राहत असल्याचे समोर आले. एमडीची डिलिव्हरी करण्यासाठी ते होळी मैदानाजवळ आले होते. मात्र, व्यवहार पूर्ण होण्यापूर्वीच पोलिसांनी त्यांना ताब्यात घेतले. यानंतर पोलिसांनी त्यांच्या घरांची झडती घेतली. तेथे आणखी एमडी आणि गांजाचा साठा आढळून आला. संपूर्ण कारवाईत ४३९ ग्रॅम एमडीची किंमत १ कोटी ७५ लाख ६० हजार रुपये, तर ४२३ ग्रॅम गांजाची किंमत १६ हजार ९२० रुपये असल्याचे पोलिसांनी सांगितले. याशिवाय ४० हजार रुपये किमतीचे दोन मोबाईल जप्त करण्यात आले. वरिष्ठ पोलीस निरीक्षक राहुल लोखंडे, पोलीस निरीक्षक अभय दंडगव्हाळ यांच्या मार्गदर्शनाखाली एपीआय विजय नाईक, पोलीस उपनिरीक्षक अविनाश दराडे यांच्यासह पथकाने ही कारवाई केली. अटकेनंतर दोन्ही आरोपींना किल्ला न्यायालयात हजर करण्यात आले. न्यायालयाने त्यांना पोलीस कोठडी सुनावली असून, या रॅकेटमधील इतर आरोपींचा शोध घेण्यासाठी पोलिसांनी तपास आणि विशेष मोहीम सुरू केली आहे.