मुंबई : गेल्या १०० वर्षात मुंबई आणि मुंबईकरांच्या लाडक्या लाईफलाइनमध्ये म्हणेजच लोकलमध्ये अनेक बदल झाले. जलदगतीने मुंबईत रेल्वेचं जाळं तयार झालं त्यामुळे मुंबईकरांचा तसेच पर्यटकांचा प्रवास हा सुखकर झाला. आता मुंबईच्या लोकलचा आणखी कायापालट होणार आहे. मुंबईच्या लोकलचा चेहरा बदलण्यात वंदे मेट्रोची साथ मिळणार असल्याने वंदे मेट्रो लोकल या नावाने ती लोकल ओळखण्यात येणार आहे. मुंबई रेल्वे विकास महामंडळ याने मुंबईच्या उपनगरीय नेटवर्कसाठी २,८५६ वंदे मेट्रो डब्यांची खरेदी करणार आहे . यामुळे मुंबईकरांचा प्रवास हा आता आणखी सुसाट आणि आधुनिक आणि सुरक्षित होणार आहे.
मुंबई अर्बन ट्रान्सपोर्ट प्रोजेक्ट (MUTP) टप्पा ३ आणि ३-A अंतर्गत एकूण २३८ वंदे मेट्रो एसी लोकल गाड्या घेतल्या जातील. प्रत्येक गाडी १२ डब्यांची असेल. या गाड्यांमध्ये ‘वॉक-थ्रू’ डिझाइन असेल, ज्यामुळे प्रवासी एका डब्यातून दुसऱ्या डब्यात सहज जाऊ शकतील आणि गर्दीचे विभाजन होईल. तसेच आरामदायी कुशन सीट्स, दिव्यांगांसाठी विशेष जागा आणि मोठ्या खिडक्या असतील.स्वयंचलित दरवाजे, सीसीटीव्ही कॅमेरे, धूर आणि आग शोधणारी यंत्रणा आणि आपत्कालीन टॉक – बॅक सिस्टिम असेल. मुंबईच्या हवामानाचा आणि पावसामुळे खोळंबा होणाऱ्या रेल्वेसेवांचा विचार करता वंदे मेट्रो लोकल वॉटरप्रूफ आणि गंज – रोधक बनवल्या जाणार आहेत. मेक इन इंडिया या मोहिमेचा मुंबई लोकल ही एक भाग असून वंदे मेट्रो गाड्यांमुळे मुंबईतील लोकल प्रवासाचा दर्जा हा वाढणार असून प्रवाशांना आत जागतिक दर्जाचा अनुभव मिळणार आहे.
अत्याधुनिक सोयीसुविधा :
- यूएसबी चार्जिंग पॉईंट
- वाय-फाय सुविधा
- डिजिटल रूट मॅप
