नवी मुंबई : ऑटोरिक्षावर वाहतूक नियमांच्या उल्लंघनाबाबतची कारवाई न करण्यासाठी रिक्षाचालकाकडे दहा हजार रुपये लाचेची मागणी करून तडजोडीअंती दोन हजार रुपयांची लाच स्वीकारणाऱ्या दोन वाहतूक पोलिसांना नवी मुंबई लाचलुचपत प्रतिबंधक विभागाच्या पथकाने सापळा लावून अटक केली. प्रवीण राठोड (३३) व नामदेव गादेकर (३५) अशी त्यांची नावे असून महापे वाहतूक शाखेच्या आवारात ही कारवाई करण्यात आली.
तक्रारदार रिक्षाचालक रिक्षा घेऊन दिघा येथून महापे एमआयडीसीच्या दिशेने जात होता. महापे सर्कलजवळ महापे वाहतूक शाखेतील राठोड व गादेकर यांनी त्याला अडवून रिक्षाची कागदपत्रे व ड्रायव्हिंग लायसन्सची मागणी केली. रिक्षाचालक गणवेशात नसल्याने व संबंधित कागदपत्रे नसल्याने दोघा वाहतूक पोलिसांनी त्याला १० हजार रुपये दंड भरण्यास सांगितले. अन्यथा रिक्षा जमा होईल असे सांगून, त्याला महापे वाहतूक चौकीत रिक्षा उभी करण्यास सांगितले. त्यानंतर, ५ हजार रुपये घेऊन आल्यास रिक्षा सोडून देण्याची तयारी दर्शवली. त्यामुळे रिक्षाचालकाने नवी मुंबई एसीबीकडे तक्रार केली. त्यानंतर एसीबीच्या पथकाने या तक्रारीची खातरजमा केली असता, दोघा वाहतूक पोलिसांनी रिक्षाचालकाकडे तडजोडीअंती दोन हजार रुपये स्वीकारण्याचे कबूल केले. त्यानंतर पोलिस उपअधीक्षक शिवराज म्हेत्रे यांच्या नेतृत्वाखाली पोलिस निरीक्षक अरुंधती येळवे यांच्या पथकाने महापे येथील वाहतूक शाखेमध्ये सापळा लावला होता. यावेळी वाहतूक पोलिस शिपाई प्रवीण राठोड यांनी दोन हजार रुपये लाचेची रक्कम स्वीकारल्यांनतर एसीबीने राठोड याला रंगेहाथ पकडले. त्यांनतर पोलिस शिपाई नामदेव गादेकर यालाही पकडून दोघांविरोधात तुर्भे एमआयडीसी पोलिस ठाण्यात गुन्हा दाखल केला.