कल्याण : मुंबई छत्रपती शिवाजी टर्मिनस ते साईनगर शिर्डी वंदे भारत एक्सप्रेसवर ठाकुर्ली रेल्वे स्थानकाजवळ दगड फेकणाऱ्या एका तरूणाला रेल्वे सुरक्षा बळाच्या जवानांनी तात्काळ अटक केली. एक्सप्रेसच्या खिडकीच्या काचांचे यात नुकसान झाले. दगडाच्या तडाख्याने खिडकीच्या काचांच्या ठिकऱ्या उडाल्या आणि त्या काही प्रवाशांना लागल्या. ही माहिती प्रवाशांनी तातडीने रेल्वे नियंत्रण कक्षाला दिली. कल्याण आणि डोंबिवली रेल्वे सुरक्षा बळाच्या जवानांनी तात्काळ पत्रीपूल ते ठाकुर्ली रेल्वे स्थानकांच्या दरम्यान शोध मोहीम राबवून एका तरूणाला अटक केली. रेल्वेवर दगडफेकीच्या घटना गेल्या काही काळात वाढल्याने रेल्वे प्रवासी व रेल्वे प्रवासी संघटनांकडून चिंता व्यक्त करण्यात येत आहे.
सनी कांबळे (२३) असे या तरूणाचे नाव आहे. तो मुळचा पुण्यातील शुक्रवार पेठ भागात राहणार आहे. त्यांला गांजा सेवनाचे व्यसन आहे. शुक्रवारी सीएसएमटी – साईनगर शिर्डी वंदे भारत एक्सप्रेस ठाकुर्ली रेल्वे स्थानकाकडून कल्याणच्या दिशेने धावत होती. यावेळी ठाकुर्ली रेल्वे स्थानक भागात रेल्वे मार्गातून अचानक दगडी एक्सप्रेसच्या काचेवर आदळल्या. खिडकीजवळ बसलेले प्रवासी अचानक या फटक्याने घाबरले. काचेच्या ठिकऱ्या काही प्रवाशांच्या अंगावर उडाल्या. यामध्ये कोणी जखमी झाले नाही. घडल्या घटनेने एक्सप्रेस डब्यात गोंधळ उडाला. एक तरूण रेल्वे मार्गात आपण एक्सप्रेसवर दगड फेकल्याचा आनंद आणि एक्सप्रेस सोबत स्वताच्या मोबाईलमधून सेल्फी काढत असल्याचे प्रवाशांना दिसले. त्यानंतर तो तरूण रेल्वे मार्गातून पळून गेला. जागरूक प्रवाशांनी तातडीने मध्यवर्ति रेल्वे नियंत्रण कक्षाला संपर्क करून घडल्या घटनेची माहिती दिली. रेल्वे सुरक्षा बळाचे जवान आणि कल्याण, डोंबिवली लोहमार्ग पोलीस ठाण्याचे पोलीस तातडीने पत्रीपूल ते ठाकुर्ली दरम्यान दाखल झाले. त्यांनी एक्सप्रेसवर दगड फेकणाऱ्या इसमाचा शोध सुरू केला. त्यांना ठाकुर्ली रेल्वे स्थानकाजवळील वस्तीत तुलसी इमारतीजवळ एक संशयास्पद तरूण आढळला. पोलिसांना पाहताच तो पळू लागला आणि घाबरला. हाच तो तरूण असावा संशय घेऊन पोलिसांनी त्याला ताब्यात घेतले. त्याने आपले नाव सनी कांबळे असल्याचे सांगितले. आणि पोलिसांनी त्याला फैलावर घेताच त्याने आपण वंदे भारत एक्सप्रेसवर दगड फेकल्याची कबुली पोलिसांना दिली. रेल्वे सुरक्षा बळाच्या जवानांनी तातडीने त्याला ताब्यात घेतले. कल्याण रेल्वे सुरक्षा बळ पोलीस ठाण्यात त्याच्यावर रेल्वे सुरक्षा कायद्याच्या १५३, १४७ अन्वये गुन्हा दाखल केला. त्याला तातडीने रेल्वे न्यायालयासमोर हजर करण्यात आले. न्यायालयाने त्याला न्यायालयीन कोठडीत पाठविण्याचे आदेश दिले. पोलिसांनी त्याची रवानगी आधारवाडी तुरूंगात केली. या प्रकरणाचा तपास उपनिरीक्षक संदीप पाटील करत आहेत.
