मुंबई : महाराष्ट्राचे उपमुख्यमंत्री अजित पवार यांच्या निधनामुळे संपूर्ण देश शोकसागरात बुडाला आहे. बारामती येथे झालेल्या या भीषण विमान अपघातात अजित पवारांसह ज्या ५ जणांचा मृत्यू झाला, त्यामध्ये सह-वैमानिक (Co-pilot) कॅप्टन शांभवी पाठक हिचाही समावेश आहे. आकाशात उंच भरारी घेण्याचे स्वप्न पाहणाऱ्या एका तरुण आणि जिद्दी वैमानिकाचा असा करुण अंत झाल्याने हळहळ व्यक्त केली जात आहे.
शांभवी पाठक ही मूळची मुंबईची होती. तिचे वडील सैन्य दलात अधिकारी म्हणून कार्यरत होते, त्यामुळे देशसेवेचे आणि शिस्तीचे बाळकडू तिला घरातूनच मिळाले होते. शांभवीने तिचे शालेय आणि उच्च शिक्षण मुंबईतच पूर्ण केले. तिने २०२० ते २०२२ या कालावधीत मुंबई विद्यापीठातून एरोनॉटिक्स, एव्हिएशन एरोस्पेस सायन्स आणि टेक्नॉलॉजीमध्ये पदवी (B.Sc) संपादन केली होती. वैमानिक बनण्याचे स्वप्न उराशी बाळगून शांभवीने परदेशात जाऊनही प्रशिक्षण घेतले होते. २०१८-२०१९ मध्ये तिने न्यूझीलंड इंटरनॅशनल कमर्शियल पायलट अकॅडमीतून १ वर्षाचा प्रमाणपत्र अभ्यासक्रम पूर्ण केला. या खडतर प्रशिक्षणानंतर तिने विमान वाहतूक क्षेत्रात पाऊल ठेवले.
- मार्च २०२२ मध्ये तिला ‘स्पाईसजेट’कडून एव्हिएशन सिक्युरिटी परवाना मिळाला होता.
- फेब्रुवारी २०२२ मध्ये तिने जेट ओरिएंटेशन ट्रेनिंगद्वारे A-320 विमानाचे प्रगत प्रशिक्षण यशस्वीपणे पूर्ण केले होते.
- २०२२ पासून ती ‘VSR Venture’ प्रायव्हेट लिमिटेड या कंपनीत ‘फर्स्ट ऑफिसर’ पदावर कार्यरत होती आणि याच कंपनीच्या माध्यमातून ती अजित पवारांच्या विमानाचे उड्डाण करत होती.
शांभवीला १५०० तासांच्या फ्लाईट सेवेचा अनुभव होता. ज्या वेळी अजित पवारांचे विमान बारामतीकडे निघाले, तेव्हा मुख्य पायलट कॅप्टन सुमित कपूर यांच्यासोबत शांभवी सह-वैमानिक म्हणून जबाबदारी सांभाळत होती. लँडिंगच्या वेळी उद्भवलेल्या तांत्रिक अडचणी आणि धुक्यामुळे विमानाचा भीषण अपघात झाला, ज्यामध्ये शांभवीचाही आगीत होरपळून मृत्यू झाला. एका तेजस्वी वैमानिकाचे स्वप्न आकाशात झेपावण्यापूर्वीच जमिनीवर कोसळले, ही महाराष्ट्रासाठी मोठी शोकांतिका ठरली आहे.
