मुंबई : म्हाडाच्या मुंबई मंडळाच्या घरांच्या सोडतीची प्रतीक्षा अखेर संपली. आता ही तयारी पूर्ण झाली व ३० मार्चपासून २६४० घरांसाठी नोंदणी, अर्जविक्री-स्वीकृती प्रक्रिया सुरू झाली आहे. म्हाडाच्या https://housing.mhada.gov.in या अधिकृत संकेतस्थळावरून इच्छुकांना नोंदणी, अर्जविक्री-स्वीकृती प्रक्रिया पार पाडता येणार आहे. नोंदणी, अर्जविक्री-स्वीकृतीची ही प्रक्रिया ३० एप्रिलपर्यंत सुरू राहणार असून त्यानंतर अर्जांची छाननी करून पात्र अर्जदारांची यादी प्रसिद्ध करून १५ मे रोजी सोडतीचा निकाल जाहीर केला जाणार आहे.
मुंबई मंडळाच्या या सोडतीत कन्नमवार नगरमधील १२०० हून अधिक घरांचा तर पत्राचाळीतील ८५ घरांचा समावेश आहे. वांद्रे एमआयजी वसाहतीतील २६ घरेही सोडतीत समाविष्ट आहेत. त्याचबरोबर चेंबूर, गिरगाव, माझगाव, दादर, वडाळ्यासह अन्य ठिकाणच्या घरांचाही यात समावेश आहे. गरजूंना परवडणाऱ्या दरात घरे उपलब्ध करून देण्याचे मुख्य उद्दिष्ट म्हाडाचे आहे. तर परवडणाऱ्या दरात मुंबईत हक्काचे घर खरेदी करण्यासाठी सर्वसामान्यांसाठी म्हाडा हे एकमेव माध्यम आहे. त्यामुळे म्हाडाच्या सोडतीत अत्यल्प आणि अल्प गटासाठी सर्वाधिक घरे असणे अपेक्षित असते. हाच गट गरजू मानला जातो. असे असताना २६४० घरांच्या सोडतीत अत्यल्प गटासाठी सर्वात कमी, केवळ १४५ घरे समाविष्ट आहेत. त्यामुळे या गटातील इच्छुकांच्या पदरी निराशाच पडण्याची शक्यता आहे. मात्र त्याचवेळी मध्यम गटासाठी सर्वाधिक १४०८ घरे समाविष्ट असून उच्च गटासाठी २२९ घरे आहेत. तर अल्प गटासाठी ८५८ घरे सोडतीत असणार आहेत. अत्यल्प गटासाठी कमी घरे असल्याने अत्यल्प गटातील इच्छुक नाराज होणार असतानाच इतर उत्पन्न गटातील घरांची संख्या अधिक असली तरी त्यांच्याही पदरी निराशा पडणार आहे. कारण या सोडतीतील घरांच्या किंमती गगनाला भिडल्या आहेत. ३२ लाखांपासून थेट आठ कोटींपर्यंत घरांच्या किंमती आहेत. ही घरे इच्छुकांना परवडणार का, असा प्रश्न आता निर्माण झाला आहे. कारण याआधीच्या दोन सोडतीत मुंबईतील महागडी घरे विकली न गेल्याने ११८ घरांची विक्री पहिल्यांदाच ‘प्रथम येणाऱ्यास प्रथम प्राधान्य’ तत्त्वाने करण्याची नामुष्की मंडळावर आली आहे. या योजनेतील महागडी घरे विकली जात नसल्याचे चित्र आहे. असे असतानाही १५ मे च्या सोडतीतही कोटींच्या कोटी किंमती असलेली घरे समाविष्ट आहेत. त्यामुळे या सोडतीला कसा प्रतिसाद मिळतो, याकडे आता सर्वांचे लक्ष लागले आहे. सोडतीचे वेळापत्रक जाहिरात – सोमवार, ३० मार्च नोंदणी, अर्जविक्री-स्वीकृती – ३० मार्च दुपारी ३ वाजल्यापासून ऑनलाइन अर्ज भरण्याची अंतिम मुदत – २९ एप्रिल रात्री ११.५९ वाजेपर्यंत अनामत रक्कम भरून अर्ज सादर करण्याची अंतिम मुदत – ३० एप्रिल रात्री ११.५९ वाजेपर्यंत अर्जांची प्रारूप यादी – ५ मे दुपारी ३ वाजता होणार प्रसिद्ध अर्जांची अंतिम यादी – १२ मे दुपारी ३ वाजता होणार प्रसिद्ध सोडतीची तारीख – १५ मे सकाळी ११ वाजता सोडतीचे ठिकाण अद्याप निश्चित नाही.
