पुणे : राज्यातील दुष्काळी परिस्थितीमुळे पिकांसह जनावरांच्या चाऱ्याचाही गंभीर प्रश्न निर्माण झाला आहे. या पार्श्वभूमीवर पुणे जिल्हा कृषी विभागाने शेतकऱ्यांना दिलासा देण्यासाठी राष्ट्रीय अन्नसुरक्षा पोषण अभियानांतर्गत मोफत ज्वारी आणि हरभरा बियाण्यांचे वाटप सुरू केले आहे. जिल्ह्यातील १३ तालुक्यांतील शेतकऱ्यांना ‘फुले यशोमती’ या ज्वारीच्या वाणाचे मोफत बियाणे देण्यात आले असून, त्यातून सुमारे १९ हजार ७५५ एकर क्षेत्रावर पेरणीचे नियोजन करण्यात आले आहे. बहुतांश ठिकाणी पेरणीचे काम पूर्ण झाले असून, आणखी १० हजार एकर क्षेत्रासाठी मोफत बियाणे पुढील दोन ते तीन दिवसांत वितरित करण्यात येणार आहे.
दुष्काळामुळे चाऱ्याची टंचाई निर्माण होण्याची शक्यता लक्षात घेऊन कृषी विभागाने हा उपक्रम हाती घेतला आहे. रब्बी हंगामात विहीर, कालवा, तलाव किंवा बोअरवेलमधून पाणी उपलब्ध असलेल्या क्षेत्रात ज्वारीची लागवड करून दोन ते तीन वेळा संरक्षित सिंचन दिल्यास धान्याबरोबरच जनावरांसाठी भरपूर चारा उपलब्ध होऊ शकतो. त्यामुळे शेतकऱ्यांनी या योजनेचा लाभ घ्यावा, असे आवाहन करण्यात आले आहे. यासोबतच पुणे जिल्ह्यात रब्बी हंगामात मोठ्या प्रमाणावर घेतल्या जाणाऱ्या हरभरा पिकासाठीही कृषी विभागाने मोफत बियाणे उपलब्ध करून दिले आहे. सुमारे ६ हजार ३२० एकर क्षेत्रासाठी हरभऱ्याच्या बियाण्यांचे वाटप करण्यात आले आहे. कमी पाण्यात येणारे पीक असल्याने यंदा हरभरा लागवडीकडे शेतकऱ्यांचा कल वाढला आहे. विशेषतः ऊस काढणीनंतर खोडवा न ठेवता हरभऱ्याची लागवड केल्यास जमिनीचा पोत सुधारण्यासही मदत होते. मोफत बियाण्यांचा लाभ घेण्यासाठी शेतकऱ्यांनी महाडीबीटी पोर्टलवर अर्ज करावा. ज्वारीसाठी संबंधित योजनेअंतर्गत अर्ज करता येणार असून, हरभऱ्याच्या बियाण्यांसाठी ‘प्रमाणित बियाणे’ ऐवजी ‘मिनी किट’ या घटकांतर्गत अर्ज करण्याचे आवाहन जिल्हा अधीक्षक कृषी अधिकारी वैभव तांबे यांनी केले आहे.

