वसई : विरार पूर्व येथील बरफपाडा परिसरातील जंगलात सुरू असलेल्या गावठी दारूच्या हातभट्टीवर अंमली पदार्थ विरोधी कक्ष-२ च्या पथकाने धडक कारवाई करत मोठा साठा उद्ध्वस्त केला. या कारवाईत पोलिसांनी दारू निर्मितीसाठी साठवून ठेवलेले तब्बल २ हजार ९५० लिटर कच्चे रसायन (वॉश) तसेच दारू तयार करण्यासाठी वापरले जाणारे साहित्य जप्त केले. एकूण २ लाख ३ हजार ६०० रुपये किमतीचा मुद्देमाल जागेवरच नष्ट करण्यात आला. मीरा-भाईंदर, वसई-विरार पोलीस आयुक्तालयाच्या हद्दीत अवैध दारू निर्मिती, विक्री तसेच अंमली पदार्थांच्या तस्करीविरोधात कठोर कारवाई करण्याचे निर्देश वरिष्ठ अधिकाऱ्यांनी दिले आहेत. त्यानुसार अंमली पदार्थ विरोधी कक्ष-२ चे पथक ३ जून रोजी विरार परिसरात गस्त घालत असताना त्यांना बरफपाडा येथील जंगलात अवैध हातभट्टी सुरू असल्याची गुप्त माहिती मिळाली.
या माहितीच्या आधारे पोलिसांनी बरफपाडा जंगलातील एका ओढ्याच्या पात्रात शोधमोहीम राबवली. तपासादरम्यान विटांची चूल उभारून गावठी दारू तयार करण्यासाठी हातभट्टी सुरू असल्याचे आढळून आले. घटनास्थळी विविध ड्रममध्ये मोठ्या प्रमाणात कच्चे रसायन साठवून ठेवण्यात आले होते. पोलिसांनी तत्काळ कारवाई करत रसायनासह दारू निर्मितीचे साहित्य जप्त केले आणि संपूर्ण साठा नष्ट केला. या प्रकरणी विरार पोलीस ठाण्यात गुन्हा दाखल करण्यात आला असून पुढील तपास सुरू आहे. विशेष म्हणजे, मागील काही दिवसांत बरफपाडा परिसरात गावठी हातभट्ट्यांवर करण्यात आलेली ही तिसरी कारवाई आहे. त्यामुळे हा परिसर अवैध दारू निर्मितीचे केंद्र बनत असल्याची चर्चा सुरू झाली असून पोलिसांकडून अशा बेकायदेशीर धंद्यांविरोधात कारवाई अधिक तीव्र करण्याचे संकेत देण्यात आले आहेत.
