मुंबई : डेंगी, हिवताप आणि इतर कीटकजन्य साथीच्या आजारांना आळा घालण्यासाठी महानगरपालिकेने व्यापक प्रतिबंधात्मक मोहीम हाती घेतली आहे. डासांची उत्पत्तीस्थाने शोधून नष्ट करण्यासाठी घरोघरी तसेच परिसरात तपासणी मोहीम राबविण्यात येत असून आतापर्यंत तब्बल ३२ लाखांहून अधिक घरांची तपासणी करण्यात आली आहे. त्यापैकी सुमारे ३० लाख घरांच्या परिसरात धूम्रफवारणी करण्यात आली आहे. जानेवारी २०२६ ते २७ मे २०२६ या कालावधीत महानगरपालिकेच्या सर्व २६ प्रशासकीय विभागांमध्ये मिळून २२ हजार ८० परिसर भेटी देण्यात आल्या. या मोहिमेदरम्यान ४२ हजार ३२९ डासांची उत्पत्तीस्थाने शोधून ती तात्काळ नष्ट करण्यात आली आहेत. यामध्ये डेंगीचा प्रसार करणाऱ्या ‘एडिस एजिप्ती’ डासांच्या अळ्यांची ३७ हजार ८०० ठिकाणी, तर मलेरियाचा प्रसार करणाऱ्या ‘ऍनॉफिलीस स्टिफेन्सी’ डासांच्या अळ्यांची ४ हजार ५२९ ठिकाणी नोंद झाली. महानगरपालिका आयुक्त अश्विनी भिडे यांच्या मार्गदर्शनाखाली कीटकनाशक विभागाकडून ही मोहीम राबविण्यात येत आहे.
महापालिकेच्या कीटकनाशक विभागातील सुमारे एक हजार कर्मचारी, अधिकारी आणि कामगार मुंबईतील विविध भागांमध्ये नियमित सर्वेक्षण आणि तपासणी करत आहेत. तपासणीदरम्यान पाण्याच्या टाक्या, झोपडपट्ट्यांमधील पाण्याचे पिंप, प्लास्टिक व ताडपत्रीमध्ये साचलेले पाणी, टायर, कुंड्यांखालील ताटल्या, नारळाच्या करवंट्या तसेच फेकून दिलेल्या बाटल्यांमधील पाणी यांची विशेष तपासणी करण्यात आली. डासांची संभाव्य उत्पत्तीस्थाने ठरू शकणारे ५४० टायर्स आणि १ लाख १६ हजार २५१ अडगळीतील वस्तू हटविण्यात आल्या आहेत. याशिवाय, मुंबईतील चार हजार इमारत पुनर्विकास प्रकल्पांवरील सुरक्षा अधिकाऱ्यांना डास प्रतिबंधात्मक उपाययोजनांबाबत प्रशिक्षण देण्यात आले आहे. सार्वजनिक आरोग्य खाते आणि कीटकनाशक खाते यांच्या माध्यमातून औषध फवारणी, धूम्रफवारणी आणि डासांची उत्पत्तीस्थाने नष्ट करण्याचे काम सातत्याने सुरू असल्याचे महानगरपालिकेकडून सांगण्यात आले आहे.
