नवी मुंबई : क्राईम ब्रांचच्या अधिकाऱ्यांनी नवी मुंबईत नायजेरियन नागरिक राहत असलेल्या भागात छापेमारी केली आहे. यादरम्यान १२ कोटी रुपयांचे अंमलीपदार्थ जप्त करण्यात आले आहेत. तसेच १३ नायझेरियन नागरिकांना अटक करण्यात आली आहे. हे सर्व भारतात अवैधपणे राहत असून ड्रग्ज व्यवसायात सहभागी असल्याची माहिती आहे. नवी मुंबईत काही नायजेरियन नागरिक अवैधपणे राहत असून ड्रग्ज व्यवसाय करत असल्याची माहिती मुंबई क्राईम ब्रांचला मिळाली होती. या माहितीच्या आधारे पोलिसांनी ही कारवाई केली.
या कारवाईबरोबरच व्हिसाची मुदत संपलेल्या आणखी तिघांनाही क्राईम ब्रांचने ताब्यात घेतलं आहे. तसेच ७३ नायजेरियन नागरिकांना तत्काळ देश सोडण्यासाठी नोटीस बजवण्यात आली आहे. मुंबईत क्राईम ब्रांचने जवळपास नवी मुंबईतल्या २५ ठिकाणांवर ही छापेमारी केली. या छापमारेदरम्यान १२ कोटी रुपयांचे अंमलीपदार्थ जप्त करण्यात आले आहेत. यामध्ये २ किलो ४५ ग्रॅम कोकेन, ६६३ ग्रॅम एम.डी., ५८ ग्रॅम मिथिलीन, २३ ग्रॅम चरस, ३१ ग्रॅम गांजा, याचा समावेश आहे. याप्रकरणी १३ जणांवर गुन्हा दाखल करण्यात आला असून त्यांना न्यायालयात हजर केलं जाणार असल्याची अशी माहिती मुंबईत क्राईम ब्रांचचे सहाय्यक आयुक्त भाऊसाहेब ढोले यांनी दिली आहे. याप्रकरणाचा पुढील तपास सुरु असल्याचही क्राईमब्रांचकडून सांगण्यात आलं आहे.
