सावंतवाडी : कोकणची दक्षिण काशी म्हणून ओळखल्या जाणाऱ्या मालवण तालुक्यातील मसूरे-आंगणेवाडी येथील श्री देवी भराडी मातेचा वार्षिक जत्रोत्सव आणि जिल्हा परिषद-पंचायत समिती निवडणुकीची मतमोजणी एकाच दिवशी (९ फेब्रुवारी) आल्याने प्रशासनासमोर मोठे आव्हान उभे ठाकले आहे. या पार्श्वभूमीवर, कायदा व सुव्यवस्था राखण्यासाठी आणि वाहतुकीचा खोळंबा टाळण्यासाठी नागरिकांनी प्रशासनाला पूर्ण सहकार्य करावे, असे आवाहन जिल्हाधिकारी तृप्ती धोडमिसे आणि पोलीस अधीक्षक डॉ. मोहन दहिकर यांनी केले आहे.
उपमुख्यमंत्री अजित पवार यांच्या निधनामुळे राज्यात तीन दिवसांचा दुखवटा जाहीर करण्यात आला आहे. यामुळे राज्य निवडणूक आयोगाच्या निर्देशानुसार निवडणुकीच्या वेळापत्रकात बदल करण्यात आला असून, ५ फेब्रुवारीऐवजी आता ७ फेब्रुवारीला मतदान आणि ७ फेब्रुवारीऐवजी ९ फेब्रुवारीला मतमोजणी होणार आहे. ९ फेब्रुवारी रोजीच आंगणेवाडी जत्रा असल्याने संपूर्ण महाराष्ट्रातून लाखो भाविक सिंधुदुर्गात दाखल होतात. एकाच वेळी मतमोजणीची प्रक्रिया आणि जत्रेचा जनसागर यामुळे यंत्रणेवर प्रचंड ताण येण्याची शक्यता आहे. मतमोजणी केंद्रांवर कडेकोट बंदोबस्त आणि जत्रोत्सवासाठी स्वतंत्र सुरक्षा व्यवस्था.भाविकांच्या गाड्या आणि निवडणूक ड्युटीवरील वाहने यामुळे होणारी वाहतूक कोंडी टाळण्यासाठी विशेष ‘ट्रॅफिक प्लॅन’ तयार करण्यात येणार आहे. विनाकारण गर्दी टाळावी, अफवांवर विश्वास ठेवू नये आणि प्रशासनाने दिलेल्या सूचनांचे पालन करावे. लोकशाहीचा उत्सव आणि श्रद्धेचा महोत्सव एकाच दिवशी येत आहेत. अशा वेळी नागरिकांनी संयम आणि शिस्त पाळून प्रशासनाला सहकार्य करावे, जेणेकरून दोन्ही प्रक्रिया शांततेत पार पडतील. असे प्रशासनाने आवाहन केले आहे.
