मुंबई : मुंबई इंडियन्सच्या संघात Indian Premier League २०२६ दरम्यान महत्त्वाचा बदल करण्यात आला आहे. संघातील खेळाडू अथर्व अनकोळेकर याला गुडघ्याच्या दुखापतीमुळे बाहेर बसावे लागल्याने त्याच्या जागी क्रिश भगत याचा समावेश करण्यात आला आहे. स्पर्धा सुरू होण्यापूर्वीच अथर्वला दुखापत झाली होती, त्यामुळे तो पहिल्या चार सामन्यांमध्ये खेळू शकला नाही. यानंतर संघ व्यवस्थापनाने अधिकृतपणे क्रिश भगतला संघात स्थान दिले असून, त्याला आता आयपीएलमध्ये खेळण्याची संधी मिळणार आहे.
क्रिश भगत हा २१ वर्षीय अष्टपैलू खेळाडू असून तो देशांतर्गत क्रिकेटमध्ये पंजाबचे प्रतिनिधित्व करतो. उजव्या हाताने गोलंदाजी आणि फलंदाजी अशी दुहेरी भूमिका तो निभावू शकतो. गेल्या दोन वर्षांपासून तो मुंबई इंडियन्सच्या निवड चाचण्यांचा भाग होता. यावर्षी डीवाय पाटील टी-२० स्पर्धेत त्याने रिलायन्सकडून खेळताना उत्कृष्ट कामगिरी केली. त्याची मेहनत, सरावातील सातत्य आणि सामन्यातील प्रभावी प्रदर्शन यामुळे प्रशिक्षकांनी त्याच्यावर विश्वास दाखवला असल्याचे संघाने स्पष्ट केले आहे. क्रिश भगतचा प्रवासही प्रेरणादायी राहिला आहे. तो जालंधर पश्चिमचे आमदार मोहिंदर भगत यांचा पुतण्या असून, कारकिर्दीच्या सुरुवातीला त्याला पाठीच्या कण्याला गंभीर दुखापत झाली होती. मात्र या संकटावर मात करत त्याने दमदार पुनरागमन केले. कूचबिहार स्पर्धेत ५०० हून अधिक धावा आणि कर्नल सी. के. नायडू स्पर्धेत ३० फलंदाजांना बाद करत त्याने आपली क्षमता सिद्ध केली आहे. आता आयपीएलमधील संधीमुळे त्याच्या कारकिर्दीला नवे वळण मिळण्याची अपेक्षा व्यक्त केली जात आहे.
