वृत्तसंस्था : पहिल्याच टी-२० सामन्यात भारताने आयर्लंडची दाणादाण उडवल्याचे पाहायला मिळाले. भारताच्या गोलंदाजांनी यावेळी अचूक आणि भेदक मारा केला आणि आयर्लंडच्या धावसंख्येला लगाम लावला. त्यामुळे भारतीय संघाला गोलंदाजीच्या जोरावर विजयाचा पाया रचता आला. भारताने टॉस जिंकला आणि जसप्रीत बुमराने गोलंदाजी स्विकारली. बुमराचा हा निर्णय योग्य असल्याचे त्याने आपल्या गोलंदाजांसह दाखवून दिले. पहिल्याच चेंडूवर बुमराहला चौकार स्विकारावा लागला. पण त्याने हार मानली नाही. कारण त्यानंतर बुमराने दमदार कमबॅक केले. कारण बुमराहने दुसरा चेंडू असा टाकला की, कोणाला पहिल्यांदा नेमकं काय झालं तेच कळलं नाही. फक्त एवढंच समजलं की, बेल्स उडाल्या आहेत. कारण त्याच्या या चेंडूचा वेग एवढा होता की, नेमकं काय घडलं हे सुरुवातीला कोणालाच कळलं नाही. हा चेंडू एवढ्या वेगाने गेला की, बॅट्समनला आपण बोल्ड झालो आहोत, हे पण समजले नाही. बेल्स उडाल्यावर जेव्हा भारतीय संघाने जल्लोष करायला सुरुवात केली त्यावेळी तेव्हा बॅट्समनला समजले की आपण बोल्ड झालो आहोत. बुमराची ही कमबॅक करत असताना पहिली विकेट ठरली. त्यानंतर बुमराने या षटकात अजून एक विकेट मिळवली. बुमराबरोबर यावेळी वेगवान गोलंदाज प्रसिध कृष्णाने अचूक आणि भेदक मारा केला. या दोघांसह फिरकी गोलंदाज रवी बिश्नोईने आपल्या गोलंदाजीच्या तालावर आयर्लंडच्या फलंदाजांना चांगलेच नाचवले. त्यामुळेच आयर्लंडचा अर्धा संघ हा फक्त ३१ धावांत गारद झाला होता. त्यानंतर खेळपट्टीने आयर्लंडच्या फलंदाजांना मदत केली आणि त्यांना शतकाची वेस ओलांडता आली.
आयर्लंडकडून यावेळी कर्टीस कॅम्फर हा एकमेव फलंदाज चांगला फॉर्मात असल्याचे पाहायला मिळाले. कारण त्याने ३ चौकार आणि एका षटकाराच्या जोरावर ३९ धावांची खेळी साकारली. त्यामुळे आयर्लंडच्या संघाला यावेळी शतक पूर्ण करता आले. त्यामुळे आयर्लंडला यावेळी भारतापुढे आव्हानात्मक धावसंख्या उभारता आली. पण त्यानंतर मकार्थीने अखेरच्या चेंडूवर षटकार लगावत आपले अर्धशतक पूर्ण केले आणि संघाला १३९ धावांचा पल्ला गाठून दिला.