मुंबई : बोरीवली (प.) येथे लागलेल्या आगीत घराचे व दुचाकीचे नुकसान झाले होते. पण सीसी टीव्ही कॅमेऱ्यातील चित्रणामुळे घातपाताचा प्रकार उघडकीस आला. चार आरोपींनी तक्रारदार महिला व तिच्या कुटुंबियांना जाळण्याच्या उद्देशाने आग लावल्याचे निष्पन्न झाले. याप्रकरणी एमएचबी पोलिसांनी चौघांविरोधात गुन्हा दाखल केला असून त्यापैकी एकाला अटक करण्यात आली आहे. आरोपी सराईत असून त्यांच्याविरोधात हत्येच्या प्रयत्नाचा गुन्हा दाखल करण्यात आल्याची माहिती अधिकाऱ्याने दिली.
बोरिवली (प.) येथील गणपत पाटील नगरमधील एका घराला १४ मे रोजी भीषण आग लागली होती. त्यात तक्रारदार महिला ज्युली केवट (३७) यांच्या घराचे व घराशेजारी उभ्या दुचाकीचे नुकसान झाले. सुरूवातील ही दुर्घटना असल्याचे सर्वांना वाटत होते. पण सीसीटीव्ही कॅमेऱ्यातील चित्रणाच्या तपासणीत हा घातपाताचा प्रकार असल्याचे निष्पन्न झाले. आरोपी देवराज सिद्धार्थ पाटील (२२) व त्याचे तीन साथीदार १४ मे रोजी पहाटे केवट यांच्या घरा शेजारी उभ्या असलेल्या दुचाकीला व घराला आग लावत असल्याचे सीसी टीव्ही कॅमेऱ्यातील चित्रणात दिसले. याप्रकरणानंतर केवळ यांनी नुकतीच एमएचबी पोलिसांकडे तक्रार केली. त्यानुसार पोलिसांनी भारतीय न्याय संहिता कलम १०९, ३२६ (एफ), ३३६ (जी), ३५१ (३), ३ (५), ३७ (१) व १३५ अंतर्गत हत्येच्या प्रयत्नाचा गुन्हा दाखल करण्यात आला आहे. याप्रकरणी देवराज सिद्धार्थ पाटील (२२) याला अटक करण्यात आल्याची माहिती अधिकाऱ्याने दिली. इतर तीन आरोपींचा शोध सुरू आहे.