मुंबई : मोबाइल गेमिंगचे वेड शाळकरी मुलांमध्ये गंभीर रूप धारण करत आहे. या व्यसनामुळे मुलांमधील आरोग्याशी निगडीत वेगवेगळ्या प्रकारच्या समस्याही वाढीस लागल्या आहे. राज्याच्या सार्वजनिक आरोग्य विभागाने ही गंभीर होत जाणारी समस्या लक्षात घेऊन ऑनलाइन खेळ जबाबदारीने खेळा, या स्वरूपाची मोहीम हाती घेण्याचा निर्णय घेतला आहे. अनेकांना सतत ऑनलाइन गेम खेळल्यामुळे काय दुष्परिणाम होतात, याची कल्पना नसते. त्यांना वेळीच मार्गदर्शन करणे गरजेचे आहे. त्यामुळेच आरोग्य विभागाने ऑनलाइन गेमिंगच्या तोट्यांविषयी जनजागृती करण्याचे ठरवले आहे. उत्तर प्रदेशनंतर महाराष्ट्रात हे गेम खेळण्याचे प्रमाण वाढते असल्याचे आरोग्य विभागातील तज्ज्ञांनी सांगितले. मानसोपचारतज्ज्ञांनी या प्रकारामुळे एकाग्रता कमी होणे, लक्ष न लागणे, चिडचिडेपणा वाढणे, संताप येणे, नैराश्याची भावना अधिक प्रबळ होणे, उदास-एकाकी वाटणे अशा प्रकारचे दुष्परिणाम दिसून येतात, याकडे लक्ष वेधले. शैक्षणिक सुविधा म्हणून मुलांना स्वतंत्र मोबाइल किंवा गॅजेट द्यावा लागतो. लॉकडाऊननंतर मुलांना घरी बसावे लागत असल्याने अशा गेमिंगमध्ये वेळ घालवण्याचे प्रमाण वाढले आहे. ‘मुलांचा ऑनलाइन वावर आणि गॅजेट हाताळण्याचा कालावधी वाढला आहे. त्यामुळे डिजिटल व्यसनाधीनता वाढली आहे. या सर्वेक्षणामध्ये मानसिक आरोग्याच्या या समस्यांवर गांभीर्याने विचार करण्यात येईल’, याकडे डॉ. व्ही.एस. मोहिते यांनी लक्ष वेधले.
सार्वजनिक आरोग्य विभागाने हाती घेतलेल्या या उपक्रमामध्ये राज्यात एका प्रश्नावलीच्या माध्यमातून सर्वेक्षण करण्यात येणार आहे. त्यात अठरा ते पंचेचाळीस वर्षे या वयोगटातील व्यक्तींचा सहभाग असणार आहे. यात सहभागी होणाऱ्या व्यक्तींनी दहा ते पंधरा प्रश्न विचारले जातील. या सर्वेक्षणातून जे निष्कर्ष दिसून येतील ते अत्यंत महत्त्वाचे असतील व त्याआधारे यापुढील टप्प्यांतील जाणीवजागृती उपक्रम कसा राबवायचा, याचे धोरण ठरवण्यात येणार आहे.