मुंबई : दक्षिण मुंबईतील कुलाबा, नरिमन पॉइंट, मोहम्मद अली रोड, सॅडहास्टॅ रोड या भागातील अधिकृत फेरीवाल्यांसाठी स्वतंत्र झोन तयार करा, असे निर्देश मुंबई शहराचे पालकमंत्री दीपक केसरकर यांनी मुंबई महापालिका प्रशासनाला दिले आहेत. तसेच अनधिकृत फेरीवाल्यांमुळे या ठिकाणी येजा करणाऱ्या नागरिकांना त्रास होणार नाही याची काळजी घ्या, अशी सूचना ही त्यांनी केली आहे. नागरिकांच्या विविध समस्या जाणून त्यांचे निराकरण करण्यासाठी ‘शासन आपल्या दारी’ आले आहे. मुंबई महानगरपालिकेच्या विविध वॉर्डात रहिवाशांची भेट घेत असून त्यांच्या समस्या तातडीने सोडविण्यासाठी उपाययोजना करण्यात येत असल्याचे केसरकर यांनी सांगितले.
‘शासन आपल्या दारी’ या उपक्रमाअंतर्गत ‘ए’ व ‘बी’ वॉर्ड यांचा संयुक्त कार्यक्रम एशियाटिक लायब्ररीजवळील रेडक्रॉस सोसायटी येथे आयोजित करण्यात आला. यावेळी एकूण ११० तक्रारींचे निराकरण करण्यात आले. मुंबईकरांच्या समस्या सोडविण्यावर भर देण्यात येत आहे. ज्येष्ठांच्या समस्या प्राधान्याने सोडविल्या जाणार आहेत. ज्येष्ठ नागरिकांना दुकानावरून अन्नधान्य आणणे शक्य होत नाही. यासाठी अन्न धान्य वाटप करण्यासाठी स्वतंत्र वाहनाची व्यवस्था करण्याचे निर्देशही त्यांनी यावेळी दिले. दक्षिण मुंबईतील अनधिकृत फेरीवाले, गुन्हेगारी रोखणे, पदपथावर राहणाऱ्यांना निवारा उपलब्ध करून देणे आदी समस्या पालकमंत्र्यांसमोर प्रामुख्याने मांडण्यात आल्या. गुन्हेगारी रोखण्यासाठी संबंधित पोलीस स्टेशनच्या अधिकाऱ्यांनी लक्ष देण्याचे निर्देश केसरकर यांनी संबंधित अधिकाऱ्यांना दिले.
