पिंपरी : शहरातील व्यावसायिक आणि रहिवासी वापराच्या इमारतींमध्ये अग्निसुरक्षा यंत्रणा रामभरोसे असल्याची बाब पिंपरी-चिंचवड महापालिकेने केलेल्या सर्वेक्षण मोहिमेत आढळून आली आहे. अनास्थेला जबाबदार व्यावसायिकांना नोटिसा बजावण्यात आल्या असून, योग्य ती कार्यवाही न झाल्यास कठोर कारवाईचा इशारा अग्निशमन विभागाने दिला आहे. शहरात नागरीकरणाचा वेग झपाट्याने वाढत आहे. या पार्श्वभूमीवर अग्निप्रतिबंधक उपाययोजनांवर पालिका प्रशासनाने भर दिला आहे. विभागाकडे दर वर्षी एक हजारांहून अधिक वर्दी प्राप्त होत असल्याचे आकडेवारीवरून स्पष्ट झाले आहे. याशिवाय निवासी भागात व्यवसाय करणाऱ्यांची संख्या मोठी आहे. त्यामुळे आगीवर नियंत्रण मिळविण्यात अडथळे येत आहेत. तळवडे, चिखली भागातील दुर्घटना लक्षात घेऊन पालिका प्रशासनाने सर्वेक्षण मोहीम राबविण्याचे आदेश आयुक्त शेखर सिंह यांनी दिले होते.
आयुक्तांच्या आदेशानुसार अग्निशमन विभागाने नुकतीच मोहीम राबविली. पहिल्या टप्प्यामध्ये चिखली, तळवडे, रुपीनगर, चिंचवड परिसरात सर्वेक्षण केले. धोकादायकपणे व्यवसाय सुरू असलेल्या आणि उपाययोजना न केलेल्या एक हजारांहून अधिक व्यावसायिकांना पालिकेने नोटिसा बजावल्या. आवश्यक कार्यवाही न केलेल्यांना दुसऱ्यांदा नोटिसा बजावण्यात येणार आहेत. निवासी इमारतींमध्ये व्यवसाय आणि व्यावसायिक इमारतींमध्ये नागरिकांचे वास्तव्य अशा मिश्र स्वरूपाच्या बाबी आढळून आल्या आहेत. व्यवसायाच्या ठिकाणी व्यावसायिकांनी अग्निशामक विभागाचे प्रमाणपत्र घेणे आवश्यक असते. मात्र, त्याकडे दुर्लक्ष होत असल्याची माहिती सर्वेक्षणामध्ये आढळून आली आहे; तसेच अनधिकृत ठिकाणी आवश्यक खबरदारी घेण्यासंदर्भात अनास्था दिसून आली आहे. ‘महाराष्ट्र आग प्रतिबंधक व जीव संरक्षण उपाययोजना नियमा’नुसार, व्यावसायिक मिळकतींनी अग्निसुरक्षा यंत्रणा राबविणे आवश्यक आहे. नियमांचे उल्लंघन केल्यास कारवाईची तरतूद आहे. नियमानुसार, ‘आयएसआय’ मानांकन असलेले सहा किलोग्रॅम क्षमतेचे एबीसी फायर एक्स्टिंग्विशर, दहा किलोंचे मॉड्युलर एक्स्टिंग्विशर, मॅन्युअल फायर अलार्म, एलपीजी गॅस डिटेक्शन सिस्टीम, फायर होझ, होझ रील होझ, फायर पंप इत्यादी यंत्रणा आवश्यक आहे. या उपाययोजनानंतरच अग्निसुरक्षितता प्रमाणपत्र देण्यात येते. मात्र, या नियमांकडे दुर्लक्ष होत असल्याचे पाहणीत आढळून आले आहे.
सर्वेक्षणातील प्रमुख मुद्दे
– व्यावसायिक इमारतींमध्ये रहिवास.
– अग्निसुरक्षितता प्रमाणपत्र नाही.
– बाहेर पडण्याच्या मार्गावर विविध साहित्य पडून.
– व्यवसायिक जागेत धोकादायक उपकरणे.
– इलेक्ट्रिकल वायरिंग जुने आणि जीर्ण.
– इलेक्ट्रिकल देखभाल दुरुस्तीकडे दुर्लक्ष.
– मनोज लोणकर, उपायुक्त, अग्निशमन विभाग, पिंपरी महापालिका
