ठाणे : गणेशोत्सवाच्या पार्श्वभूमीवर मुंब्रा खाडीकिनारी सुरू असलेल्या साफसफाईदरम्यान, कर्मचाऱ्यांना एका पिशवीत संशयास्पदरीत्या अनेक मतदार ओळखपत्रे आणि पॅन कार्डे आढळून आली. या प्रकाराची माहिती मिळताच काँग्रेसचे ब्लॉक अध्यक्ष निलेश पाटील घटनास्थळी धाव घेत, दस्तऐवजांचे फोटो आणि व्हिडीओ घेतले. चौकशीत अनेक ओळखपत्रांवरील पत्त्यावर प्रत्यक्षात कोणीही राहत नसल्याचे उघडकीस आले असून, ही सर्व कागदपत्रे बोगस असल्याचे निष्पन्न झाले आहे.
ठाणे काँग्रेसच्या शिष्टमंडळाने ही कार्डे १४९ विधानसभा मतदारसंघाचे मतदार नोंदणी अधिकारी संदीप थोरात यांच्याकडे सुपूर्त केली. यावेळी ठाणे काँग्रेसचे मुख्य प्रवक्ते राहुल पिंगळे यांनी प्रचंड संताप व्यक्त करत निवडणूक आयोगावर थेट हल्ला चढवला. ते म्हणाले, “खासदार राहुल गांधी गेली अनेक वर्षे वोट चोरीसाठी बोगस मतदार नोंदणी होत असल्याचे पुराव्यासकट सांगत आहेत. परंतु, निवडणूक आयोग सतत डोळेझाक करून सरकारला पाठीशी घालत आहे. ठाण्यात घडलेली ही घटना त्याचे ठोस पुरावे देणारी आहे.” “ही बोगस ओळखपत्रे नेमकी कशी तयार झाली? त्यासाठी कोणते आधारकार्ड, रहिवाशी दाखले आणि मोबाईल क्रमांक सादर करण्यात आले? ही नोंदणी कोणत्या सायबर कॅफे किंवा आधारसेतूमार्फत करण्यात आली? याचा उपयोग नेमक्या कोणत्या निवडणुकांमध्ये झाला? या सर्व बाबींचा सखोल तपास झाला पाहिजे. हा प्रकार म्हणजे लोकशाहीवर थेट आघात असून, दोषींवर कठोरात कठोर कारवाई झाली पाहिजे. अन्यथा लोकशाही ही केवळ नावापुरती राहील.” काँग्रेसने या प्रकरणाची उच्चस्तरीय चौकशी करून संबंधित अधिकाऱ्यांनाही जबाबदार धरण्याची मागणी केली आहे. मंदारमाला अपार्टमेंट, अभय नगर झोपडपटी, कळवा या पत्त्यावर परब नावाचे गृहस्थ मागील २० वर्षांपासून राहत आहेत. परंतू, खाडीजवळ सापडलेल्या कार्डांवरील पत्ता हा परब यांचा असल्याचे दिसते. त्यामुळे सर्व कार्डांची पडताळणी होणे अत्यावश्यक आहे. जमा करण्यात आलेली बहुतेक ओळखपत्रे २०१५ सालातील असून, काही २०१४, २०१६ आणि २०१७ सालातील आहेत. हा घोटाळा केवळ मतदार नोंदणीपुरता मर्यादित नसून, लोकशाही व्यवस्था धोक्यात आणणारा कट आहे, अशी प्रतिक्रिया ठाणे शहर कॉंग्रेस प्रवक्ते राहुल पिंगळे यांनी दिली.
