पुणे : विद्युत ठेकेदाराकडून दोन हजारांची लाच घेणाऱ्या महावितरणच्या राजगुरूनगर उपविभागातील कनिष्ठ अभियंत्याला लाचलुचपत प्रतिबंधक विभागाने (एसीबी) पकडले.अजय दत्तात्रय शेवकरी असे लाचखोर अभियंत्याचे नाव आहे. याबाबत एका विद्युत ठेकेदाराने लाचलुचपत प्रतिबंधक विभागाकडे तक्रार दिली होती.तक्रारदाराने घरगुती ग्राहकांच्या वीजजोड कामाचे मंजुरी पत्रक शेवकरी यांच्याकडे सादर केले होते. शेवकर यांनी ठेकेदाराकडे सहा हजार रुपयांची लाच मागितली होती. ठेकेदाराने तडजोडीत दोन हजार रुपयांची लाच देण्याचे मान्य करुन तक्रार नोंदविली. त्यानंतर राजगुरुनगर येथील महावितरणच्या कार्यालयात सापळा लावून शेवकरी यांना पकडण्यात आले. पोलीस अधीक्षक अमोल तांबे, अतिरिक्त अधीक्षक सूरज गुरव यांच्या मार्गदर्शनाखाली पोलीस उपअधीक्षक क्रांती पवार आणि पथकाने ही कारवाई केली.
