मुंबई : मुंबईतील बांधकाम व्यावसायिकाकडून १६४ कोटींच्या खंडणीप्रकरणी आरोपी हिरेन भगत, रोमी भगत यांच्याशी संबंधित मुंबईतील अनेक ठिकाणी ईडीने छापेमारी केली. या प्रकरणाचा तपास नुकताच दिल्ली ईडी पथकाकडे हस्तांतरित करण्यात आला आहे. खंडणी प्रकरणातील मुख्य आरोपी रोमी भगत हा अनेक राजकीय पक्षांशी संबंधित असून तो नोकरशहांसह अनेक राजकारण्यांच्या जवळचा असल्याचे समोर आले आहे. रोमी हा सध्या न्यायालयीन कोठडीत असून, या तपासासाठी त्याच्या कोठडीची मागणी करण्यासाठी ईडीचे पथक विशेष पीएमएलए न्यायालयात जाण्याची शक्यता आहे.
या प्रकरणातील आरोपींमध्ये रोमी व्यतिरिक्त अमेय सावेकर, कल्पेश भोसले, अवनीश दुबे, राजेंद्र शिरसाट आणि राकेश केडिया यांचा समावेश आहे. ईडी कारवाईचा धाक दाखवत ‘ओमकार रियल्टर्स ॲण्ड डेव्हलपर्स’चे मालक ताराचंद मूलचंद वर्मा यांच्याकडून १६४ कोटी रुपयांची खंडणी मागितल्याप्रकरणी गुन्हे शाखेने जानेवारीमध्ये ६ आरोपींना अटक केली होती. यामध्ये हिरेश ऊर्फ रोमी भगत याचा समावेश होता. याप्रकरणी वांद्रे पोलिस ठाण्यात गुन्हा दाखल करून या प्रकरणाचा तपास गुन्हे शाखेला वर्ग करण्यात आला. याच प्रकरणी मनी लॉड्रिंगच्या आरोपात ईडीने कारवाई केली.
