वृत्तसंस्था : चीनमध्ये सुरू असलेल्या आशियाई क्रीडा स्पर्धेत भारताच्या पुरुष हॉकी संघाने अंतिम सामन्यात जपानचा पराभव करत सुवर्णपदक जिंकले. फायनल मॅचमध्ये भारताकडून मनप्रीत सिंग, हरमनप्रीत सिंग, अमित रोहिदास यांनी गोल केले. फायनलमध्ये भारताने जपानवर ५-१ असा विजय मिळवत देशाला सुवर्णपदक जिंकून दिले. या विजयासह हॉकी संघाने २०२४ साली होणाऱ्या पॅरिस ऑलिंपिकसाठी प्रवेश मिळवला आहे. तर भारताच्या पदकांची संख्या ९५वर पोहोचली आहे. चुरशीच्या झालेल्या अंतिम सामन्यात पहिल्या क्वॉर्टरमध्ये दोन्ही संघांना एकही गोल करता आला नाही. दुसऱ्या क्वॉर्टरमध्ये देखील दोन्ही संघांना गोल करण्यात यश आले नाही. पण क्वॉर्टरचा खेळ संपण्याच्या आधी मनप्रीत सिंगने भन्नाट शॉट मारून गोल केला. मनप्रीतच्या या शॉटवर जपानने रिव्ह्यू घेतला. त्यानंतर भारताला अधिकृत गोल देण्यात आला. यामुळे भारताने १-० अशी आघाडी घेतली.
तिसऱ्या क्वॉर्टरमध्ये माजी कर्णधार हरमनप्रीत सिंगने पेनल्टीचा पुरेपुर फायदा घेतला आणि १० ते १५ मीटर लांबूनन शानदार शॉट मारून गोल केला. यामुळे भारताची आघाडी २-० अशी झाली. या दुसऱ्या गोलमुळे भारतीय संघाचा आत्मविश्वास वाढला आणि त्याचा परिणाम लगेच दिसून देखील आला. तिसऱ्या क्वॉर्टरमध्ये भारताने पेनल्टीवर आणखी एक गोल करून ३-० अशी मजबूत आघाडी केली. यावेळी अमित रोहिदासने मैदानी गोल करत जपानच्या गोलपोस्ट मध्ये हल्ला चढवला. चौथ्या क्वॉर्टरमध्ये भारताने आणखी एक गोल करून सुवर्णपदक निश्चित केले. त्यानंतर जपानने मॅचमधील त्यांचा पहिला गोल करून आघाडी कमी करण्याचा प्रयत्न केला. पण तोपर्यंत फार उशीर झाला होता. लढत संपण्याच्या २ मिनिटे आधी भारताने ५वा गोल केला आणि आघाडी ५-१ अशी केली. भारतीय संघाला पाठिंबा देण्यासाठी महिला हॉकी संघ स्टेडियममध्ये उपस्थित होता. संपूर्ण आशियाई क्रीडा स्पर्धेत भारतीय हॉकी संघाने शानदार कामगिरी केली आणि अंतिम फेरीत जपानविरुद्ध देखील भारताने पुन्हा एकदा धमाकेदार खेळ करून दाखवला. भारतीय हॉकी संघाने या स्पर्धेत एकही लढत गमावली नाही. आशियाई क्रीडा स्पर्धेत भारताचे हॉकीमधील हे चौथे सुवर्णपदक आहे याआधी भारताने १९६६, १९९८, २०१४ साली सुवर्ण जिंकले होते.