पुणे : कोयत्याच्या सहाय्याने कॉलेज परिसरात दहशत निर्माण करू पाहणार्‍या डॅनी टोळीला पोलिसांनी खाक्या दाखवून कॉलेज परिसरातच धिंड काढली. एकाप्रकारे उदयनोमुख भाईंना पोलिसांनी इशाराच दिला आहे. कुणाल कानगुडे आणि ओंकार ननवरे उर्फ डॅनी या दोघांचा गेल्या काही दिवसांपूर्वी वाद झाला होता. त्यातूनच कुणाल याने डॅनीला कोयता दाखवून दहशत निर्माण करण्याचा प्रयत्न केला. दरम्यान, हा सर्व प्रकार कर्वे रस्त्यावरील एका नामांकित कॉलेजमध्ये घडला होता. याबाबतचा व्हिडीओ व्हायरल झाल्यानंतर पोलिसांनी सुरुवातीला कोयता फिरविणार्‍या कुणाल कानगुडे (वय.१९) याला अटक केली. त्याच्याकडे केलेल्या चौकशीत डॅनी याने आपली टोळी सक्रिय केल्याची माहिती मिळाली. दरम्यान त्याचा शोध घेत असताना, शिवाजीनगर आणि डेक्कन पोलिसांना ते दरोड्याच्या तयारीत असताना नदीपात्रात मिळून आले. गौतम उर्फ लखन अंबादास बनसोडे (वय-२९, रा. राजेंद्रनगर), राम विलास लोखंडे (वय-२३,रा.नवी पेठ), सुनिल बाबासाहेब कांबळे (वय-२०,रा.शिवाजीनगर), अश्रू खंडु गवळी (वय-१९,रा.दांडेकर पुल), रोहन किरण गायकवाड (वय-१९, रा.शिवाजीनगर), रोहित चांदा कांबळे (वय-१९, रा.शिवाजीनगर), किरण सिताप्पा खेत्री (वय-२०, रा.कात्रज), ओंकार उर्फ डॅनी बाळु ननावरे (वय-२१, रा.राजेंद्रनगर), शाम विलास लोखंडे (वय-२०, रा.नवी पेठ) अशी अटक करण्यात आलेल्या आरोपींची नावे आहेत.
अटक करण्यात आलेले आरोपी हे दरोडा टाकण्याचे प्रयत्नात असताना पोलिसांनी अटक केल्याची माहिती दिली आहे. डेक्कन पोलिसांना पेट्रोलिंग दरम्यान जंगली महाराज रस्त्यावर संभाजी उद्यानाचे गामील मुठा नदीपात्रात नऊ ते दहा जण दारु पित बसले असून त्यांच्याजवळ कोयत्यासह घातक शस्त्र असून ते साई पेट्रोल पंप येथे दरोडा टाकण्याचा कट रचत असल्याचं आढळून आलं. त्यानुसार पोलिसांनी सापळा रचून नऊ आरोपींना अटक केली. त्यांच्याकडे कोयता, स्टील रॉड, मिरचीपुड, नायलॉन दोरी, मास्क, चाकु असे शस्त्र मिळून आले आहे. याबाबत डेक्कन पोलीस ठाण्यात आरोपींवर गुन्हा दाखल करण्यात आला आहे. ही कारवाई अप्पर पोलीस आयुक्त प्रविणकुमार पाटील, पोलीस उपायुक्त संदीप सिंह गिल्ल, सहाय्यक पोलीस आयुक्त वसंत कुवर, वरिष्ठ पोलीस निरीक्षक विपीन हसबनीस, पोलीस निरीक्षक शंकर साळुंखे, सहाय्यक पोलीस निरीक्षक एस अहिवळे, पोलीस उपनिरीक्षक मीरा कवटीकवार यांनी केली आहे.
कॉलेजधील तरुणीवर भरदिवसा सदाशिव पेठेत झालेल्या खूनी हल्यानंतर पोलिसांनी गुन्हेगारी टोळकी, रोडरोमियो यांच्याविरुद्ध धडक मोहिम हाती घेतली आहे. पोलीस आयुक्त रितेशकुमार, सह. पोलीस आयुक्त संदीप कर्णिक हे स्वतः प्रत्येक घटनेवर लक्ष ठेवून आहेत. डेक्कन आणि शिवाजीनगर पोलिसांनी दाखविलेल्या तत्परतेमुळे डॅनी टोळी गजाआड झाली. त्याबद्दल प्रभारी अधिकारी आणि त्यांच्या स्टाफचे आयुक्तालयात दोघांनी पुष्पगुच्छ देऊन कौतूक केले.