मुंबई : परदेशातील मुलीला भेटण्यासाठी आसुसलेल्या वृद्ध दाम्पत्याला सायबरचोराने तब्बल नऊ लाखांना फसवले आहे. मुलुंड येथे राहणाऱ्या या दाम्पत्याला अमेरिकेला जाण्यासाठी डॉलर्सची आवश्यकता होती. त्यासाठी गूगलवर सर्च केलेल्या फोन क्रमांकावर फोन करणे त्यांना चांगलेच महागात पडले आहे. याप्रकरणी मुलुंड पोलिस ठाण्यात गुन्हा दाखल झाला आहे. मुलुंड पश्चिमेकडील एका सोसायटीमध्ये वनिता (बदललेले नाव) या ७५ वर्षीय पतीसोबत वास्तव्यास आहेत. त्यांची मुलगी अमेरिकेत राहत असून तिला भेटण्याची दोघांची इच्छा होती. अमेरिकेत जाण्यासाठी डॉलर या चलनाची आवश्यकता होती. दोघेही वयस्कर असल्याने वनिता यांनी गूगलवर जाऊन स्टेट बँक मुख्यालयाचा क्रमांक मिळवला. या क्रमांकावर संपर्क करताच समोरील व्यक्तीने अक्षय वर्मा बोलत असल्याचे सांगितले. वनिता यांनी त्याला डॉलरचा दर विचारला असता त्याने प्रति डॉलर ८३ रूपये असल्याची माहिती दिली. वनिता यांनी त्या व्यक्तीला आपणास तीन हजार डॉलर्सची आवश्यकता असल्याचे सांगितले.
डॉलर मिळवण्यासाठी बँकेत येण्याची गरज नसल्याचे वर्मा नावाच्या त्या व्यक्तीने सांगितले. ॲपच्या माध्यमातून हा व्यवहार करता येईल, असे वनिता यांना सांगितले. त्याने त्यांना एका ॲपचे नाव देत ते प्ले स्टोअरमधून डाउनलोड करण्यास सांगितले. त्यानुसार वनिता यांनी हे ॲप डाऊनलोड करून ज्या खात्यातून पैसे द्यायचे आहेत, त्याचा तपशील भरला. पैसे वळविण्यासाठी तुमच्या परवानगीची गरज असून त्यासाठी ओके बटन दाबण्यास सांगितले. हे बटन दाबताच त्यांच्या मोबाइलवर ओटीपी आले. ॲपच्या माध्यमातून वनिता यांच्या मोबाइलचा ताबा घेतल्याने ओटीपी वापरून वर्मा याने सुमारे नऊ लाख परस्पर वळविले. या प्रकारामुळे ज्येष्ठ नागरिक असलेल्या वनिता यांचे पैसे गेले आणि मुलीला भेटण्यासाठी अमेरिकेला जाण्याची संधीही हुकली आहे.
