मुंबई : मुंबईकरांसाठी महत्त्वाची बातमी समोर आली असून, सीएसएमटी ते गोरेगाव दरम्यानची हार्बर मार्गावरील लोकल सेवा सुमारे ४५ दिवस बंद राहण्याची शक्यता वर्तवली जात आहे. मुंबई सेंट्रल ते बोरिवली दरम्यान सहाव्या रेल्वे मार्गिकेच्या उभारणीच्या महत्त्वाकांक्षी प्रकल्पासाठी वांद्रे-खार उड्डाणपुलाची पुनर्बांधणी करण्यात येणार असून, त्यासाठी ही वाहतूक व्यवस्था तात्पुरती बदलण्याचा विचार सुरू आहे. या प्रकल्पाअंतर्गत वांद्रे स्थानकात नवीन फलाटाची उभारणीही करण्यात येणार आहे. मुंबई रेल्वे विकास महामंडळाच्या (एमआरव्हीसी) मुंबई अर्बन ट्रान्सपोर्ट प्रोजेक्ट (एमयूटीपी-२) अंतर्गत मुंबई सेंट्रल ते बोरिवली दरम्यान सुमारे ३० किलोमीटर लांबीची सहावी मार्गिका विकसित केली जात आहे. यापैकी खार ते बोरिवली हा टप्पा पूर्ण झाला असून, मुंबई सेंट्रल ते खार या उर्वरित भागातील काम सुरू आहे. या मार्गात येणारा वांद्रे-खार उड्डाणपूल पाडून त्याच ठिकाणी आधुनिक तंत्रज्ञानाच्या साहाय्याने नव्याने उभारण्याचे मोठे आव्हान रेल्वे प्रशासनासमोर आहे. यासाठी ‘प्रीकास्ट सेगमेंटल’ बांधकाम तंत्रज्ञानाचा वापर करण्यात येणार असून, त्यामुळे काम अधिक सुरक्षित आणि कमी कालावधीत पूर्ण करण्याचा प्रयत्न केला जाणार आहे.
या पुनर्बांधणीचे काम सुमारे ४५ दिवसांत पूर्ण करण्याचे नियोजन करण्यात आले आहे. या कालावधीत सीएसएमटीहून धावणाऱ्या हार्बर मार्गावरील लोकल गाड्या केवळ वांद्रेपर्यंतच चालविण्याचा प्रस्ताव आहे. तसेच सीएसएमटी–गोरेगाव लोकल सेवा तात्पुरती ४५ दिवस बंद ठेवण्याबाबतही रेल्वे प्रशासनाकडून चाचपणी सुरू आहे. मात्र, यासंदर्भात अद्याप कोणताही अंतिम किंवा अधिकृत निर्णय जाहीर करण्यात आलेला नाही. प्रकल्प पूर्ण झाल्यानंतर वांद्रे स्थानकातील नव्या फलाटामुळे अधिक लोकल फेऱ्या चालविणे शक्य होणार असून, उपनगरी रेल्वे सेवेची क्षमता वाढण्यास मदत होईल. यामुळे भविष्यात प्रवाशांची गर्दी कमी होण्यास आणि लोकल सेवा अधिक कार्यक्षम होण्यास हातभार लागण्याची अपेक्षा आहे. सहाव्या मार्गिकेच्या उभारणीसाठी आवश्यक असलेल्या प्रमुख निविदा प्रक्रियेला ऑगस्ट २०२६ पासून टप्प्याटप्प्याने सुरुवात करण्यात येणार असल्याची माहिती रेल्वेतील वरिष्ठ सूत्रांनी दिली आहे. दरम्यान, लोकल सेवा बंद करण्याबाबतचा अंतिम निर्णय जाहीर झाल्यानंतरच प्रवाशांसाठी पर्यायी वाहतूक व्यवस्था आणि सुधारित वेळापत्रकाची घोषणा केली जाणार आहे.
