विरार : विरार पोलीस ठाण्याचे तात्पुरता स्वरूपात स्थलांतरण करण्यात आले. या तात्पुरता स्वरूपात उभारण्यात आलेल्या पोलीस ठाण्याचे शुक्रवारी पोलीस आयुक्त मधुकर पाण्डेय यांच्या हस्ते उद्घाटन करण्यात आले. त्यामुळे पुढील कारभार आता नव्याने तयार करण्यात आलेल्या पोलीस ठाण्यातून चालणार आहे. यापूर्वी महापालिकेच्या जुन्या मुख्यालयाच्या समोर विरार पोलीस ठाणे होते. मात्र विरार पोलीस ठाण्याची इमारत अनेक वर्ष जुनी झाल्याने धोकादायक बनली होती. तर दुसरीकडे पावसाळ्यात या इमारतीला ताडपत्रीचा आधार घ्यावा लागत होता. तर जागा ही अपुरी असल्याने कामकाजात अडचणी येत होत्या. त्यामुळे नवीन पोलीस ठाण्याची इमारत तयार करण्याची गरज निर्माण झाली होती. त्याच पार्श्वभूमीवर आता जुन्या विरार पोलीस ठाण्याचे नूतनीकरण केले जाणार आहे. यासाठी या पोलीस ठाण्याचे तात्पुरता स्वरूपात स्थलांतर केले आहे.विरार पोलिसांनी विरार पूर्वेच्या अंबामाता मंदिराजवळ विविध सोयीसुविधांयुक्त असे पोलीस ठाणे तयार करण्यात आले आहे. हे पोलीस ठाणे पोलीस वेल्फेअर फंडातून केले असून अवघ्या दोन ते तीन महिन्यात हे काम पूर्ण केले असून यासाठी १२ लाख इतका निधी खर्च करण्यात आला आहे.
यामध्ये महिला कक्ष, पोलीस निरीक्षण गुन्हे कक्ष, पोलीस निरीक्षक प्रशासन, गुन्हे प्रकटीकरण कक्ष, सी सी टी एन एक्स क्राइम ब्रांच कक्ष, अर्थशाखा प्रतिबंधक कक्ष, रायटर कक्ष, वरिष्ठ पोलीस निरीक्षक, ठाणे अंमलदार कक्ष, अशा विविध स्वरूपाचे उत्तम कक्ष नागरिकांच्या सेवेसाठी तयार आले आहे. या पोलीस ठाण्याचे उदघाटन शुक्रवारी (१३ जून) मीरा भाईंदर वसई विरार पोलीस आयुक्त मधुकर पाण्डेय यांच्या हस्ते पार पडले. यावेळी परिमंडळ ३ चे पोलीस उपायुक्त जयंत बजबळे, सहायक पोलीस आयुक्त विजय लगारे, वरिष्ठ पोलीस निरीक्षक लालू तुरे, विशाल वळवी, विजय पाटील, दिलीप घुगे, प्रकाश कावळे, हरीलाल जाधव व अन्य पोलीस अधिकारी व कर्मचारी उपस्थित होते. जुन्या पोलीस ठाण्याच्या ठिकाणी जागा अपुरी होती. तेव्हा तिथे नवीन इमारत तयार केली जाणार आहे. त्याचे काम पूर्ण होईपर्यंत या ठिकाणी पोलीस ठाण्याचा कारभार चालविला जाईल. जेव्हा नवीन इमारत पूर्ण होईल तेव्हा तात्पुरता स्थलांतर केलेल्या जागी सहायक पोलीस आयुक्त कार्यालय तयार केले जाईल असे पोलीस आयुक्त मधुकर पाण्डेय यांनी सांगितले आहे. याशिवाय आयुक्तालयाच्या कार्यक्षेत्रातील अन्य पोलीस ठाणे ही सुसज्ज बनविण्याचे काम सुरू असल्याचे यावेळी पोलीस आयुक्तांनी स्पष्ट केले.
