नाशिक : नाशिकमध्ये वाढलेल्या थंडीच्या लाटेमुळे नागरिकांसह लहान विद्यार्थ्यांचेही हाल होत आहेत. याच पार्श्वभूमीवर विद्यार्थ्यांच्या आरोग्याचा विचार करत नाशिक महापालिकेने शाळांच्या सकाळच्या वेळेत बदल करण्याचा महत्त्वपूर्ण निर्णय घेतला आहे.
महापालिकेच्या शिक्षण विभागाकडून मिळालेल्या माहितीनुसार, आता पालिकेच्या सर्व शाळा सकाळी ७ ऐवजी ८ वाजता भरतील. थंडीचा पारा सातत्याने घसरत असल्याने विद्यार्थ्यांच्या सोयीसाठी हा निर्णय घेण्यात आला आहे. दुपारच्या सत्राची वेळ मात्र पूर्ववतच राहणार असल्याचे स्पष्ट करण्यात आले आहे. दरम्यान खासगी शाळांसाठी हा निर्णय सक्तीचा नसून त्यांनी स्वतःच्या पातळीवर थंडीचा विचार करून वेळेत बदल करावा असे निर्देश महापालिकेकडून देण्यात आले आहेत. याआधी पुण्यातही थंडीच्या वाढत्या परिणामामुळे शाळांच्या सकाळच्या वेळेत बदल करण्यात आला होता. आता नाशिक महापालिकेनेही तोच नियम लागू करत विद्यार्थ्यांना थंडीपासून संरक्षण देण्याचा प्रयत्न केला आहे.
