डोंबिवलीत सराफाच्या दुकानातील सोन्याचा ऐवज लुटणारा कारागिर अटकेत

डोंबिवली : येथील पूर्व भागातील नेहरु रस्त्यावरील एका सराफाने दुकानातील १२ लाख ७२ हजार रुपयांचे सोन्याचे दागिने होलमार्क करण्यासाठी दुकानातील कारागिराकडे दिले. इच्छित स्थळी कारागिराने न जाता ते दागिने घेऊन तो फरार झाला. रामनगर पोलिसांनी तात्काळ तपास करुन कारागिराला अटक केली. या प्रकाराने जवाहिऱ्यांमध्ये खळबळ उडाली आहे. दोन महिन्यापूर्वी असाच प्रकार कल्याणमध्ये झाला होता. त्यावेळी कारागिराने लाखो रुपयांचे दागिने पळविले होते. त्याला नंतर राजस्थानमधून अटक करण्यात आली होती.पोलिसांनी सांगितले, बसंतीलाल चपलोत (६६) यांचे डोंबिवलीतील नेहरु रस्त्यावर प्रगती ज्वेलर्स नावाने दुकान आहे. या दुकानात विक्रम गोपाळ रावल (२८) हा काही वर्षापासून विश्वासाने काम करतो. विक्रम विश्वासू असल्याने दुकानमालक बसंतीलाल यांनी विक्रमकडे दुकानातील १२ लाख ७२ हजार रुपयांचे सोन्याचे दागिने होलमार्क करण्यासाठी दिले. ते इच्छित स्थळी नेणे विक्रम कडून अपेक्षित होते. विक्रम दुकानातून सोन्याचा ऐवज घेऊन बाहेर पडला. तो इच्छित स्थळी पोहचला आहे का म्हणून मालक बसंतीलाल यांनी त्याला संपर्क केला. तेथे तो पोहचला नसल्याचे आढळून आले. त्यांनी होलमार्क केंद्राच्या ठिकाणी संपर्क साधला. तेथेही तो गेला नसल्याचे आढळून आले. या प्रकाराने अस्वस्थ बसंतीलाल आणि त्यांच्या सहकाऱ्यांनी विक्रमची परिसरात शोधाशोध केली. तो कोठेच आढळला नाही. त्याचा मोबाईल बंद आढळला.